ԵՐԵՎԱՆ, 4 հունվարի – Sputnik. Հայաստանում գրիպի Ա տեսակի H1N1 ենթատեսակից (խոզի գրիպ) 2 մահվան դեպք է գրանցվել։ Տեղեկությունը ասուլիսում հայտնեց ՀՀ ԱՆ Հիվանդությունների վերահսկման և կանխարգելման ազգային կենտրոնի ներհիվանդանոցային վարակների համաճարակաբանության բաժնի պետ Ռոմելլա Աբովյանը։
«Մահացած պացիենտները եղել են 35 տարեկան, ընդ որում` նրանցից մեկն ունեցել է խրոնիկ հիվանդություններ, 4–րդ աստիճանի ճարպակալում։ Երկուսն էլ գտնվել են ռիսկի խմբում»,–ասաց Աբովյանը։
Ներկայացնելով ՀՀ–ում գրիպի և սուր շնչառական վարակների հետ կապված իրավիճակը` Աբովյանը նշեց, որ Հայաստանի հիվանդանոցային բաժանմունքներում կա հոսպիտալացված 584 պացիենտ, որոնց 96 տոկոսը երեխաներ են։
«Հայաստանի հիվանդանոցային բաժանմունքներում թոքաբորբով հոսպիտալացված 209 պացիենտ կա, որոնցից 127–ը 0-18 տարեկան են։ Իսկ վերակենդանացման բաժանմունքներում ունենք 55 պացիենտ, որոնցից 47–ը 0-18 տարեկան երեխաներ են»,–ասաց նա։
Աբովյանը հորդորեց սուր շնչառական վարակին բնորոշ ախտանշաններ ունեցողներին շտապ դիմել բժշկի, որպեսզի խուսափեն հիվանդության բարդ ընթացքից։
Առողջապահության նախարարության մանկաբուժության գծով խորհրդատու Սերգեյ Սարգսյանն էլ նշեց, որ երեխաների շրջանում գրիպի վիրուսի հետ միասին սրվել են նաև այլ վիրուսները, մասնավորապես շնչառական սինցիցիալ վիրուսը (RSV), որը հոսպիտալացվածների զգալի մասի մոտ առկա է:
«Այս վիրուսը երեխաների մոտ առաջացնում է թթվածնային քաղց, հետևաբար առաջանում է երեխաներին թթվածին տալու անհրաժեշտություն»,–ասաց նա։
Նրա խոսքով` երեխաների մոտ երբեմն մի քանի վիրուս համատեղ են ընթանում, վերջերս շատ են գրանցվում նաև ականջաբորբի դեպքերը, որոնք երկարացնում են բուժման ընթացքը։
Աբովյանը հորդորեց հիվանդ երեխաներին ուսումնական հաստատություններ չուղարկել, իսկ փակ տարածքներում` հատկապես հասարակական տրանսպորտում, դիմակ դնել։