ԵՐԵՎԱՆ, 30 դեկտեմբերի – Sputnik. Ռուսաստանն ու Չինաստանը կշարունակեն համագործակցությունը ռազմատեխնիկական ոլորտում, ինչը նպաստում է երկու երկրների անվտանգության ապահովմանը։ Այս հայտարարությունն արել է ՌԴ նախագահ Վլադիմիր Պուտինը Չինաստանի առաջնորդ Սի Ծինպինի հետ առցանց բանակցությունների ժամանակ։
«Իհարկե, ռուս-չինական համագործակցության, մեր հարաբերությունների ամբողջ համալիրում առանձնահատուկ տեղ ունի ռազմական և ռազմատեխնիկական համագործակցությունը, որը նպաստում է մեր երկրների անվտանգության ապահովմանը և առանցքային տարածաշրջաններում կայունության պահպանմանը։ Մենք նպատակ ունենք ամրապնդել Ռուսաստանի և Չինաստանի զինված ուժերի միջև փոխգործակցությունը»,- ասել է ՌԴ նախագահը։
Պուտինը նշել է, որ Ռուսաստանի ու Չինաստանի հարաբերությունները աշխարհաքաղաքական աճող լարվածության պայմաններում հասունություն և կայունություն են դրսևորում:
«Մեր հարաբերությունները արժանապատվորեն դիմակայում են բոլոր փորձություններին, ցույց են տալիս հասունություն և կայունություն, շարունակում են դինամիկ զարգանալ։ Ինչպես արդեն ավելի վաղ նշել ենք, այս կապերը լավագույնն են ամբողջ պատմության ընթացքում և 21-րդ դարում խոշոր տերությունների համագործակցության վառ օրինակ են» , - ասել է ՌԴ նախագահը։
Պուտինի կարծիքով՝ միջազգային ասպարեզում Ռուսաստանի և Չինաստանի գործակցությունը ծառայում է արդար աշխարհակարգի ձևավորմանը։
«Մոսկվայի ու Պեկինի գործակցությունը միջազգային ասպարեզում, այդ թվում՝ ՄԱԿ-ի Անվտանգության խորհրդի, Շանհայի համագործակցության կազմակերպության, ԲՐԻԿՍ-ի, G20-ի շրջանակում, ծառայում են արդար, միջազգային իրավունքի վրա հիմնված աշխարհակարգի ձևավորմանը», - ասել է ՌԴ նախագահը:
Նա նշել է, որ Ռուսաստանն ու Չինաստանը նույն կերպ են նայում գլոբալ աշխարհաքաղաքական լանդշաֆտի վերափոխման պատճառներին, ընթացքին ու տրամաբանությանը։