44-օրյա պատերազմի զոհերի նույնականացված աճյունները պետության կողմից հուղարկավորվելու դեպքում եղբայրական գերեզմանում չեն ամփոփվի։ Sputnik Արմենիայի հետ հարցազրույցում անդրադառնալով մինչ օրս չհուղարկավորված մասունքների խնդրին`այս մասին ասաց ՀՀ առողջապահության նախարար Անահիտ Ավանեսյանը։
Հայտնել ենք, որ 44–օրյա պատերազմի մասնակիցների մասունքների որոշ մասը զոհերի ծնողները հրաժարվում են վերցնել` չվստահելով գենետիկ հետազոտությունների արդյունքներին։ Առողջապահության նախարարը նախկինում հայտնել էր, որ եթե հարազատները շարունակեն հրաժարվել, ապա պետությունն իր վրա կվերցնի զոհերի մասունքների հուղարկավության պարտավորությունը։
«Մենք հասկանում ենք, որ սա բավական բարդ, դժվարին հոգեբանական խնդիր է, և պետք է հնարավորինս նուրբ աշխատել, որ մարդիկ ի վերջո ընդունեն այդ ցավալի իրողությունը և հուղարկավորեն իրենց հարզատներին։ Բայց հասկանում ենք նաև, որ պետությունը ևս ունի պարտականություն այս աճյունների նկատմամբ, և մենք չենք կարող մշտապես սպասել»,– ասաց նախարարը։
Անահիտ Ավանեսյանը վստահեցրեց, որ եթե նույնիսկ պետության կողմից հուղարկավորվելուց հետոհարազատները որոշեն վերահուղարկավորել իրենց զոհերին, ապա անհատական գերազմանների դեպքում դա առանց որևէ խնդրի հնարավոր կլինի իրականացնել։
«Խոսքը եղբայրական գերեզմանի մասին չէ։ Ես սա բազմիցս ժխտել եմ, քանի որ նման խոսակցություններ կային։ Խոսքն անհատական գերեզմանների մասին է»,– ասաց նա։
Թե չհուղարկավորված քանի զոհ է մնացել, առողջապահության նախարարը չցանկացավ հրապարակել` նշելով, որ դա ՀՀ քննչական կոմիտեի իրավասության տիրույթում է։ Բայց նշեց, որ այդպիսիք տասնյակից ավելի են։
Հիշեցնենք` այս տարվա փետրվարին Անահիտ Ավանեսյանը հայտարարել էր, որ արցախյան 44–օրյա պատերազմի զոհերի նույնականացման գործընթացն ավարտվել է, բայց դեռ կան չհուղարկավորված մասունքներ։
100–ից ավելի մասունքներ ուղարկվել էին Հոլանդիա` կրկնակի հետազոտության։ Դրանց պատասխանները, նրա խոսքով, 99 տոկոսով ճշգրիտ են։
Կան նաև մասունքներ, որոնք հնարավոր չի եղել նույնականացնել։ Դրանք, ըստ առողջապահության նախարարի, պահպանվում են պետության կողմից։