Կովկասյան կենսաբազմազանության ապաստարանի (ԿԿԱ) տարածքի ֆոտոթակարդները կրկին նկարահանել են Նեո ընձառյուծին: Տեսանյութը հրապարակվել է Վայրի բնության և մշակութային արժեքների պահպանման հիմնադրամի ֆեյսբուքյան էջում։
«Հովազների պարբերաբար մշտադիտարկումը փաստում է բնապահպանական տարածքների մասնավոր կերպով կառավարման ու պահպանման արդյունավետությունը, ինպես նաև տեղանքում բավարար սննդի՝ որս հանդիսացող կենդանատեսակների առկայության մասին»,–նշված է հաղորդագրության մեջ։
ԿԿԱ-ն ապահովում է հովազների և մյուս խոշոր կաթնասունների միգրացիոն ուղիների անընդհատելիությունը պահպանվող տարածքների միջև։
Կադրերում երևացող Նեո ընձառյուծը լավ տեսք ունի, ակտիվ է։
Հիշեցնենք, որ 2019–ի դեկտեմբերին Խոսրովի անտառում տեղադրված տեսախցիկներից մեկը «որսացել էր» կովկասյան ընձառյուծ Նեոյին։ Տեսանյութում երևում էր, թե ինչպես է գիշատիչը որոշ ժամանակ կանգնում տեսախցիկի առաջ, հետո հեռանում։
Կովկասյան կենսաբազմազանության ապաստարանն ընդգրկում է շուրջ 10000 հա պահպանվող տարածք և հարակից է «Խոսրովի անտառ» պետական արգելոցին: