ԵՐԵՎԱՆ, 14 դեկտեմբերի – Sputnik. Լաչինի միջանցքի փակումը լուրջ հումանիտար հետևանքներ ունի և վնասում է Ադրբեջանի ու Հայաստանի միջև խաղաղության գործընթացին։ Այս մասին Twitter–ի իր էջում գրել է ԱՄՆ պետքարտուղարության խոսնակ Նեդ Փրայսը։
«Լաչինի միջանցքի փակումը հետաձգում է խաղաղության գործընթացը։ Կոչ ենք անում Ադրբեջանի կառավարությանը վերականգնել միջանցքով ազատ տեղաշարժը։ Առաջ գնալու ճանապարհը բանակցությունների միջոցով է»,– ասել է Նեդ Փրայսը։
Ավելի վաղ նա նշել էր, որ էներգետիկ ենթակառուցվածքների ցանկացած կասեցում, կարող է սրել հումանիտար ճգնաժամը, հատկապես ձմռան ամսիներին։ Նա նաև անընդունելի էր համարել Լեռնային Ղարաբաղի քաղաքացիական բնակչությանը վնաս հասցնելը։
Հիշեցնենք՝ դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Նույնը տեղի էր ունեցել նաև դեկտեմբերի 3-ին։ ՌԴ խաղաղապահների՝ ավելի քան երեք ժամ տևած բանակցություններից հետո ճանապարհը երկկողմանի բացվել էր։