ԵՐԵՎԱՆ, 10 դեկտեմբերի – Sputnik. Շվեդիայի ու Ֆինլանդիայի խորհրդարանների նախագահները հունվարի կեսին կայցելեն Թուրքիա` ՆԱՏՕ–ին անդամակցելու հարցը քննարկելու։ Տեղեկությունը հայտնել է Թուրքիայի խորհրդարանի խոսնակ Մուստաֆա Շենթոփը։
«Թե այդ հարցը (ՆԱՏՕ–ին Շվեդիայի ու Ֆինլանդիայի անդամակցության վավերացման առաջարկը. խմբ.) երբ կներկայացվի խորհրդարան, կորոշվի այն գործընթացի շրջանակում, որը նախաձեռնել են մեր նախագահն ու կառավարությունը։ Նրանք որոշակի պարտավորություններ են ստանձնել։ Այս փաստաթուղթը պետք է ուսումնասիրվի: Մենք հետևում ենք այդ գործընթացին։ Վերջերս այստեղ էր Շվեդիայի վարչապետը։ Ես տեսա, որ նա շատ անկեղծ էր։ Հունվարի կեսերին կժամանեն Շվեդիայի խորհրդարանի խոսնակն ու Ֆինլանդիայի խորհրդարանի խոսնակը», - Շենթոփի խոսքը մեջբերում է «Milliyet» թերթը։
Հիշեցնենք` Ֆինլանդիան և Շվեդիան մայիսի 18-ին ՆԱՏՕ-ի գլխավոր քարտուղարին փոխանցեցին դաշինքին անդամակցելու հայտերը։ Այս պահին ՆԱՏՕ-ին Շվեդիայի ու Ֆինլանդիայի հայտերը չեն վավերացրել 30 երկրներից միայն երկուսը՝ Հունգարիան ու Թուրքիան։