Լեռնային Ղարաբաղում Լաչինի միջանցքի դեպքից հետո անհանգստությունն ավելացել է։ Ղրղզստանի մայրաքաղաք Բիշքեկում մեկնարկած հանդիպման ժամանակ այս մասին ՌԴ նախագահ Վլադիմիր Պուտինին ասաց ՀՀ վարչապետ Նիկոլ Փաշինյանը։
«Ցավոք, տարածաշրջանում իրավիճակը շարունակում է լարված մնալ` գլխավոր հարցը մնում է ԼՂ հարցի կարգավորումը։ Վերջերս լարվածություն է նկատվում նաև ԼՂ խաղաղապահների պատասխանատվության գոտում։ Վստահ եմ, որ Ձեզ տեղյակ են պահել, որ վերջերս Լաչինի միջանցքը փակել էին։ ԼՂ–ում մեծ մտահոգություն կա այդ առումով»,–ասաց Փաշինյանը։
Հիշեցնենք` դեկտեմբերի 3–ին Շուշի-Քարին տակ խաչմերուկի հատվածում քաղաքացիական հագուստներով մի խումբ ադրբեջանցիներ բնապահպանական պատճառաբանությամբ փակել էին Ստեփանակերտ-Գորիս մայրուղին։
Միջադեպի մասին տեղեկացվել էին ռուս խաղաղապահները։ Ադրբեջանական կողմի հետ ավելի քան երեք ժամ տևած բանակցություններից հետո նրանց միջնորդությամբ Արցախը Հայաստանին կապող միակ մայրուղին երկկողմանի բացվեց։