ԵՐԵՎԱՆ, 8 դեկտեմբերի – Sputnik. Հայաստանը «Մանկական Եվրատեսիլի» հոբելյանական 20-րդ տարին նշում է այնպես, ինչպես պետք է նշել։ Այս մասին հրավիրված մամուլի ասուլիսի ժամանակ ասաց Հանրային հեռուստաընկերության գործադիր տնօրեն Հովհաննես Մովսիսյանը` պատասխանելով կատարված ծախսերի մասին հարցին։
«Մենք 20-ամյակը նշում ենք այնպես, ինչպես պետք է նշենք «Մանկական Եվրատեսիլի» 20-ամյակը։ Այս անգամ այն պետք է տարբերվի նրանով, որ հոբելյանական է։ Կարծում եմ սա մեզ համար նաև հնարավորութուն է` ցույց տալու, որ Հայաստանը կարող է ընդունել մեծամասշտաբ միջոցառումներ, պլանավորել դրանք ու անցկացնել բարձր մակարդակով»,– նշեց Մովսիսյանը։
Նա ընդգծեց, որ ծախսերը հիմնականում արվել են բավականին մեծ քանակությամբ տեխնիկա (լույսեր, LED էկրաններ, ձայնային համակարգեր, նկարահանող հատուկ տեխնիկա) վարձակալելու և արտասահմանից բերելու համար։ Այս ամենի համար ծախսվել է բյուջեի գրեթե կեսը։
Մեծ ծախսեր են եղել նաև բացման արարողության միջոցառման մասով։ Հատկացված բյուջեից գումար ուղղվել է նաև մետրոյում միջոցառում իրականացնելու համար։ Ըստ Մովսիսյանի, բավականին մեծ գումար ծախսվել է նաև ներգրավված աշխատակազմի աշխատավարձերը տրամադրելու համար։
Հիշեցնենք, որ Հայաստանում «Մանկական Եվրատեսիլ-2022» երգի մրցույթի կազմակերպման համար նախատեսված ընդհանուր ծախսերը կազմելու են ավելի քան 5 մլրդ դրամ (12,3 մլն դոլար)։ Ծախսն իրականացվելու է Հայաստանի հանրային հեռուստաընկերության կողմից՝ ՀՀ կառավարության պահուստային ֆոնդի հաշվին:
Գնումը, հաշվի առնելով ժամանակի սղությունը, որոշվել էր իրականացնել առանց մրցույթ հայտարարելու` մեկ անձից գնման ընթացակարգով։
Թե իրականում որքան գումար կծախսվի «Մանկական Եվրատեսիլ– 2022» երգի մրցույթը Հայաստանում կազմակերպելու համար, պարզ կլինի արդեն դրա ավարտից հետո, երբ Հանրային հեռուստաընկերությունը կներկայացնի կազմակերպման ընդհանուր ծախսերի գծով փաստացի կատարողականը՝ ծախսերը հիմնավորող փաստաթղթերով։
Տնտեսումների դեպքում խնայված գումարը պետք է վերադարձվի ՀՀ պետական բյուջե:
Հավելենք, որ երևանյան «Մանկական Եվրատեսիլն» ամենաթանկն է մրցույթի պատմության մեջ։