ԵՐԵՎԱՆ, 8 դեկտեմբերի – Sputnik. ՀՀ կառավարության շենքի մոտ հավաքվել են Դավթաշեն վարչական շրջանի Տիգրան Պետրոսյան փողոցում գտնվող «Ասիամեգաստրոյ» ՍՊԸ–ի կողմից կառուցվող շենքում բնակարաններ գնած, սակայն խաբված քաղաքացիները։ Նրանք պահանջում են, որ համապատասխան գերատեսչությունները նիստ անցկացնել և իրենց խնդրին լուծում տալ։
Այդ շենքում բնակարան գնած Կորյուն Մխիթարյանը Sputnik Արմենիայի հետ զրույցում նշեց, որ շենքի սեփականատերը Էռնեստ Ղազարյանն է, իսկ կառուցապատողները 2 հոգի են` Ռադիկ Գևորգյանն ու Գեղամ Ասրյանը։
Բողոքի ակցիա կառավարության շենքի մոտ
© Sputnik / Armine Armenakyan
Կորյուն Մխիթարյանի խոսքով` ներկա պահին ՀՀ քննչական կոմիտեում քրեական գործ կա, ըստ որի` շենքի սեփականատերն անցնում է որպես տուժող, իսկ կառուցապատողները խաբեբաներ են, հիմնական խարդախն էլ Ասրյանն է։
«Ներկա պահին քրեական գործ է հարուցված։ Մենք գումարները տվել ենք, հետո ընկերությունը սնանկացել է, մենք էլ, ըստ օրենքի, Սնանկության դատարան ենք դիմել, ապա առաջին ատյանի ու վերաքննիչ դատարաններ։ Օրենքը մեր կողմն է, ուղղակի կալանք է դրված, այդ պատճառով հնարավոր չէ շենքի կառուցումը շարունակել։ Այժմ այդ շենքից -2 հարկ է կառուցվել։ Այժմ կա կառուցապատող, որը պատրաստ է շենքն ամբողջությամբ կառուցել և հանձնել բնակիչներին, բայց կալանքի պատճառով դա հնարավոր չէ անել»,– ասաց գնորդը։
Նախկինում էլ շենքի բնակիչները եղել են ՔԿ–ում, կառավարությունում, սակայն մինչ օրս իրենց խնդիրը լուծում չի ստացել։
Ընդհանուր առմամբ շենքը պետք է լինի 18–հարկանի, 104 բնակարանով։
Մխիթարյանը շեշտեց, որ սեփականատիրոջը վճարվել է 1 մլրդ 80 հազար դրամ։
Որոշ ժամանակ բնակիչները կանգնած էին կառավարության շենքի դիմաց, ինչից հետո Կորյուն Մխիթարյանը մտավ ներս, որտեղ նրան հայտնեցին, որ երկուշաբթի նիստ կգումարվի, փոխվարչապետի հետ կքննարկեն հարցը ու կտեղեկացնեն` արդյոք հնարավոր է այլ քննարկում կազմակերպել բնակիչների, կառավարության, ՔԿ–ի և դատախազության միջև։
Կորյուն Մխիթարյանը վստահեցրեց` իրենք շարունակելու են պայքարը։