ԵՐԵՎԱՆ, 5 դեկտեմբերի – Sputnik. Ադրբեջանն ու Թուրքիան համատեղ զորավարժություններ են անցկացնում։ Տեղեկությունը հայտնում է Ադրբեջանի պաշտպանության նախարարության մամուլի ծառայությունը։
Նշվում է, որ զորավարժություններն անցկացվում են Բաքվի և Անկարայի միջև ռազմական ոլորտում համագործակցության վերաբերյալ կնքված համաձայնագրի շրջանակում։
«Զորավարժությունները, որոնք անցկացվում են տարբեր զորատեսակների անձնակազմերի, մարտական և հատուկ ինժեներասակրավորական տեխնիկայի, ինչպես նաև ռազմական ավիացիայի միջոցների ներգրավմամբ, անցկացվում են Բաքվում և Աստարայի, Ջաբրայիլի և Իմիշլիի շրջանների տարածքում»,– ասվում է հաղորդագրության մեջ։
Վարժանքներին մասնակցում են Ադրբեջանի և Թուրքիայի ցամաքային զորքերի, ռազմաօդային ուժերի, հատուկ նշանակության ուժերի ստորաբաժանումները, հրթիռահրետանային և ինժեներական զորքերը։
Բացի այդ վարժանքների ժամանակ մշակում են գետերի վրայով պոնտոնային կամուրջների տեղադրման, պայմանական հակառակորդի տարածքում դեսանտի իջեցման գործողություններ։