ԵՐԵՎԱՆ, 3 դեկտեմբերի – Sputnik. Հայ-չինական հարաբերությունները հասել են պատմության մեջ ամենաբարձր մակարդակին։ Sputnik Արմենիային տված հարցազրույցում այս մասին ասաց Հայաստանում Չինաստանի արտակարգ և լիազոր դեսպան Յուն Ֆանը՝ մեկնաբանելով երկրների միջև դիվանագիտական հարաբերությունների հաստատման 30-ամյակի արդյունքները։
«Երկկողմ հարաբերությունների զարգացմանը նոր լիցք է հաղորդել գործարար համագործակցությունը։ Բացի այդ, երկար տարիներ Չինաստանը Հայաստանի երկրորդ առևտրային գործընկերն է եղել, արտահանման երկրորդ շուկան և ներմուծման աղբյուրը»,-ասաց դեսպանը։
Ֆանը հիշեցրեց, որ չինական ընկերությունների մասնակցությամբ նախագծեր են իրականացվում Հայաստանում։ Դրանց թվում են «Հյուսիս-Հարավ» մայրուղին, հանքային ջրի արտադրության գործարանները, ենթակայանների վերափոխումը, ֆոտոգալվանային էլեկտրակայանները և այլն։
Դիվանագետն ընդգծեց, որ երկկողմ հարաբերությունները զարգացնում և ամրապնդում են նաև միջանձնային և մշակութային փոխանակումները։
«Հայաստանում չինարեն սովորելու ձգտումը շարունակում է աճել։ Շատ համալսարաններում և միջնակարգ դպրոցներում բացվել են Կոնֆուցիուսի 3 դասարաններ և չինարենի ուսուցման 10 կենտրոններ։ Այժմ Հայաստանում չինարեն սովորողների պաշտոնական թիվը գերազանցում է 3500-ը»,-ասաց դեսպանը։
Դիվանագետը վստահեցրեց, որ կողմերը կշարունակեն ամրապնդել փոխադարձ քաղաքական վստահությունը, սերտորեն կհամագործակցեն միջազգային ասպարեզում, միմյանց կուռաջակցություն կցուցաբերեն փոխադարձ հետաքրքրություն և շահ ներկայացնող հարցերի լուծման գործում, կպաշտպանեն իրենց ինքնիշխանությունը, կապահովեն ազգային անվտանգությունն ու կայուն զարգացումը:
Նա կարծում է, որ այսօր երկու երկրներն էլ պետք է օգտվեն առևտրի և տնտեսության, ներդրումների, բժշկության, առողջապահության և այլ ոլորտներում համագործակցության ներուժն օգտագործելու հնարավորությունից՝ համագործակցության ընդլայնման համար կիրառման նոր կետեր ստեղծելով։
Խոսելով Չինաստանի կոմունիստական կուսակցության՝ վերջերս կայացած 20-րդ Համաչինական համագումարի արդյունքների և դրա նշանակության մասին՝ դեսպանը նշեց, որ համագումարի կարևորագույն ձեռքբերումը կուսակցության և երկրի բազմազգ հասարակության ձգտումներն ի մի բերելն էր և Սի Ծինփինին Չինաստանի կոմունիստական կուսակցության կենտրոնական կոմիտեի ղեկավար ընտրելը:
Նա հիշեցրեց, որ Չինաստանը ավելի քան 140 երկրների և տարածաշրջանների, այդ թվում՝ Հայաստանի հիմնական առևտրային գործընկերն է դարձել, իսկ առևտրի ընդհանուր ծավալով առաջին տեղն է զբաղեցնում աշխարհում։ Համագումարը սահմանել է Չինաստանի կոմունիստական կուսակցության հիմնական խնդիրը՝ միավորել և առաջնորդել երկրի բոլոր էթնիկ խմբերին հանուն մեծ, սոցիալիստական և արդիականացված երկրի համակողմանի կառուցման, նպաստել չինական ազգի մեծ վերածննդին՝ չինական առանձնահատկություններով արդիականացման միջոցով: Գործողությունների մանրամասն ծրագիր է ձևակերպվել Չինաստանի հետագա զարգացման համար՝ ընդգրկելով 12 ասպեկտ` ներառյալ քաղաքականությունը, տնտեսությունը, ռազմական գործն ու դիվանագիտությունը:
Հիշեցնենք, որ Հայաստանն ու Չինաստանը դիվանագիտական հարաբերություններ են հաստատել 1992 թվականի ապրիլի 6-ին։