Նոր ցուցադրություն ու ժամանակակից շունչ. Վարպետի հուշատուն-թանգարանը կներկայանա նորովի

ԵՐԵՎԱՆ, 30 նոյեմբերի, Sputnik - Արմենուհի Մխոյան. Շուշանիկի՝ մինչ օրս անհայտ համարվող նամակը Վարպետին արդեն ոչ միայն հայտնի է, այլև Գյումրու թանգարանի յուրաքանչյուր այցելու կարող է այն տեսնել, կարդալ, նաև լսել։ Ավետիք Իսահակյանի թոռը՝ Ավիկ Իսահակյանն է բացառիկ նամակը նվիրել Գյումրուն։

Այս մասին այսօր նշեց Գյումրու համայնքապետարանի Մշակույթի և երիտասարդության հարցերի բաժնի պետ Լիլիթ Թովմասյանը՝ հուշատուն-թանգարանի նոր ցուցադրության և էքսպոզիցիայի փոփոխության ու թարմացման պաշտոնական հանձնմանը նվիրված ասուլիսի ժամանակ:

«Բոլոր դասագրքերում գրված է, որ Ավետիք Իսահակյանի նամակը Շուշանիկին պահպանվում է, սակայն Շուշանիկ Մատակյանի նամակը չկա։ Այսօրվանից գրականության և իսահակյանագիտության մեջ փոխվում է շատ կարևոր մի շեշտադրում․ Շուշանիկ Մատակյանի նամակը կա և այն Գյումրիում է, Ավետիք Իսահակյանի հուշատուն-թանգարանում»,-նշեց Լիլիթ Թովմասյանը։

Ի դեպ, նամակը ոչ միայն ձեռագիր տարբերակով է, այլ նաև ձայնային՝ Շուշանիկ Մատակյանի նամակն ընթերցել են հանրաճանաչ Բաբկեն Չոբանյանն ու Նարինե Գրիգորյանը՝ անվարձահատույց։

Ավետիք Իսահակյանի հուշատուն-թանգարանի նոր ցուցադրությունը միայն նամակով չի սահմանափակվում։ Մյուս ցուցանմուշներից են Վարպետի նամակները Զապել Եսայանին, Արշակ Չոբանյանին, Անդրանիկ Կարապետյանին, Հովհաննես Շիրազին և պատասխան նամակները։

Նոր էքսպոզիցիոն պլանն իրականացվել է ԿԳՄՍՆ դրամաշնորհային ծրագրով՝ 2 մլն 300 հազար դրամի շրջանակներում։ Շինաշխատանքների համար պահանջվող 700 հազար դրամը տրամադրվել է համայնքային բյուջեից։

Թանգարանում ցուցանմուշների վերջին փոփոխությունը տեղի էր ունեցել ուղիղ 20 տարի առաջ: Այսօր արդեն փոխվել է Իսահակյանի գրական ստեղծագործական ժառանգությունը ներկայացնող 4 սրահների ամբողջ ցուցադրությունը, անցկացվել է կետային լուսավորություն, ավելացվել են մեծադիր պաստառներ, կատարվել է հսկայական տպագրական աշխատանք։

Առաջին սրահում այցելուին դիմավորում է կենսագրության տպագիր պատը, ինչը թանգարանային մշակույթի մեջ նոր ձևաչափ է, նոր խոսք։ Թանգարանը հագեցվել է աուդիո-վիդեո նյութերով՝ Իսահակյանի ու նրա գրական ժառանգության մասին հնարավոր առավելագույն տեղեկատվությամբ։

Թանգարանում կան նաև Հանրային հեռուստաընկերության արխիվից վերցված բացառիկ տեսանյութեր, կադրեր ու ձայնագրություններ, որոնցում երևում ու խոսում է Իսահակյանը։ Դրանք տեսնել-լսելու, ինչպես նաև ինքնուրույն թանգարանային նմուշների ու Իսահակյանի մասին տեղեկություն ստանալուն աջակցել է էլեկտրոտեխնիկայի վաճառքով զբաղվող ընկերություններից մեկն ու թանգարանին նվիրել է անհրաժեշտ պլանշետները։

Իսահակյանի տուն-թանգարանում իրենց հարմարավետ կզգան նաև Գյումրի այցելող հազարավոր զբոսաշրջիկների մեծ մասը. այսուհետ օտարերկրյա այցելուները կարող են Իսահակյանի բանաստեղծությունները լսել մայրենի լեզվով (ռուսերեն, անգլերեն, ֆրանսերեն և գերմաներեն)։

Նկարիչ, ծրագրի համադրող-դիզայներ Կարեն Բարսեղյանն ասում է՝ երբ թանգարանը նոր սերնդին չի ներկայանում նորագույն լուծումներով, վանում է: «Այստեղ հնարավորություն չունեինք լսելու կամ կարդալու, քանի որ գիրքը ցուցափեղկի տակ է, դրան դիպչելն էլ՝ արգելված: Այժմ դրանք թվայնացվել են ու հասանելի դարձել բոլորին»:

Թանգարանում, սակայն, դեռ շատ անելիքներ կան. շուտով կգործարկվի կայքը, առցանց ցուցադրություններ կլինեն, կենսագրությունների նոր պատն էլ կհամալրվի QR կոդերով։