ԵՐԵՎԱՆ, 24 նոյեմբերի - Sputnik. Երևանում դեկտեմբերի 11-ին կայանալիք «Մանկական Եվրատեսիլ-2022»-ի ժամանակ մասնակիցներից բացի կերգեն նաև «Եվրատեսիլ-2022» մրցույթում ՀՀ ներկայացուցիչ Ռոզա Լինը և «Մանկական Եվրատեսիլ-2021»-ի հաղթող, Հայաստանի պատվիրակ Մալենան։ Տեղեկությունը հայտնում է Հանրային հեռուստաընկերությունը։
«Ռոզա Լինը կկատարի համաշխարհային հիթ դարձած «Snap»-ը: Վերջերս երգչուհին հյուրընկալվել էր աշխարհահռչակ «The Late Late Show with James Corden» հաղորդմանը և կատարել իր «Snap» երգը` հայկական մոտիվներով: «Մանկական Եվրատեսիլի» բեմում ևս երգը կհնչի հայկական գործիքների կենդանի նվագակցությամբ և ազգային երանգներով»,– ասված է հաղորդագրությունում:
«Մանկական Եվրատեսիլ-2021»-ի հաղթող Մալենան կներկայանա նոր երգով՝ «Can’t feel anything», որի բառերի հեղինակը հենց ինքն ու Ռոզա Լինն են, իսկ երաժշտության հեղինակը Դավիթ Բադալյանն է:
Այսօր տեղի է ունեցել նաև «Մանկական Եվրատեսիլ-2022» երգի մրցույթի նախապատրաստման և կազմակերպման հանձնաժողովի նիստը, որի ընթացքում քննարկվել է «Մանկական Եվրատեսիլ-2022» երգի մրցույթի նախապատրաստական աշխատանքների ընթացքը։
Հանրային հեռուստաընկերության գործադիր տնօրեն Հովհաննես Մովսիսյանը ներկայացրել է Երևանի Կարեն Դեմիրճյանի անվան մարզահամերգային համալիրում իրականացված աշխատանքները:
Վարչապետի աշխատակազմի ղեկավար, հանձնաժողովի նախագահ Արայիկ Հարությունյանը կարևորել է շահագրգիռ գերատեսչությունների հետևողական աշխատանքը՝ միջազգային մրցույթը Հայաստանում լավագույնս անցկացնելու համար:
Նշենք, որ դեկտեմբերի 5-ին Հանրապետության հրապարակում տարբեր երկրներից ժամանած միջոցառման մասնակից երեխաները միասին վառելու են գլխավոր տոնածառի լույսերը, հրապարակում տեղի է ունենալու նաև տոնական միջոցառում և հրավառություն։