ԵՐԵՎԱՆ, 23 նոյեմբերի - Sputnik. ՀՀ Արմավիրի մարզի Արմավիր քաղաքի պահածոների արտադրամասի գործունեությունը կասեցվել է։ Տեղեկությունը հայտնում է Սննդամթերքի անվտանգության տեսչական մարմնի մամուլի ծառայությունը։
ՍԱՏՄ տեսուչները վերահսկողական միջոցառումների ժամանակ պարզել են, որ արտադրամասում խախտվել են «Սննդամթերքի անվտանգության մասին» Մաքսային Միության տեխնիկական կանոնակարգով սահմանված սանիտարահիգիենիկ նորմերը։
«Սննդամթերքի պատրաստման շինության հատակը, առաստաղը, պատերը պատրաստված չեն եղել հեշտությամբ մաքրվող և ախտահանվող նյութերից, չեն ապահովվել արտադրամասում օգտագործվող սարքավորումների պատշաճ մաքրման աշխատանքները, սննդի շղթայում ներգրավված անձնակազմը չի ենթարկվել պարտադիր նախնական և պարբերական բժշկական զննությունների»,– նշված է հաղորդագրությունում։
Նշվում է, որ տվյալ արտադրամասում խախտումների վերացման համար սահմանվել է ժամկետ: