ԵՐԵՎԱՆ, 22 նոյեմբերի – Sputnik. Բելառուսի արտգործնախարար Վլադիմիր Մակեյը ակնկալում է, որ նոյեմբերի 23-ին Երևանում կայանալիք ՀԱՊԿ գագաթնաժողովը վճռական ներդրում կունենա կազմակերպության կատարելագործման գործում։ ԱԳՆ ղեկավարը լրագրողներին ասել է, որ Մինսկն արդյունավետ բանակցություններ է ակնկալում։ Տեղեկությունը հայտնում է ԲԵԼՏԱ-ն:
«Պետք է իսկապես հասնել այնպիսի վիճակի, որ մի շարք այլ ինտեգրացիոն կառույցներ, կազմակերպություններ (տարածաշրջանային, միջազգային) հաշվի նստեն ՀԱՊԿ-ի հետ», - ասել է Մակեյը:
Ըստ նախարարի` դրա համար պետք է ամեն ինչ անել, որպեսզի կազմակերպության ներսում կորպորատիվ համերաշխությունը գերիշխի, կողմերը փորձեն լսել միմյանց, պահպանեն անվտանգությունը ՀԱՊԿ տարածքում:
«Ցավոք, միմյանց նկատմամբ բավականին շատ դժգոհություններ կան։ Պետք է այդ մասին բաց և անկեղծ խոսել, ինչպես դա անում են իսկական ընկերները։ Միայն այդպես կարելի է հասնել այն նպատակներին, որոնք դնում ես քո առջև», - ասել է նախարարը։
Պաշտոնյան հավելել է, որ ընդհանուր առմամբ ՀԱՊԿ-ի հետ կապված հարցերում Բելառուսի դիրքորոշումը չի փոխվում։
«Մենք միշտ կողմ ենք եղել բոլոր վեճերի և հակամարտությունների խաղաղ կարգավորմանը, ուզում ենք, որ կազմակերպությունն արդյունավետ գործի», - ասել է Բելառուսի ԱԳՆ ղեկավարը։
Նրա խոսքով՝ Մինսկը կողմ է, որ ՀԱՊԿ անդամ երկրները օգնեն միմյանց, այդ թվում՝ միջազգային ասպարեզում, երբ անհիմն ճնշում է գործադրվում այս կամ այն երկրի վրա: Նա ավելացրել է, որ Մինսկն առայժմ նման աջակցություն չի տեսնում։
Պատասխանելով հարցին՝ արդյոք հիմա ՀԱՊԿ-ը ճգնաժա՞մ է ապրում` հաշվի առնելով մի շարք ռազմական հակամարտությունները, որոնցում ներգրավված են կազմակերպության մասնակիցները, նախարարն ասել է, որ ցանկացած կազմակերպություն ենթակա է որոշակի ճգնաժամերի՝ կախված միջազգային իրավիճակի զարգացումից, այս կամ այն տարածաշրջանում տիրող իրավիճակից:
«Չէի ասի, որ կազմակերպությունը ինչ-որ ճգնաժամ է ապրում, բայց կան որոշակի խնդրահարույց պահեր, որոնց մասին մենք պետք է անկեղծ խոսենք», - շեշտել է նա:
Հիշեցնենք` այսօր Երևանում անցկացվել է ՀԱՊԿ արտաքին գործերի նախարարների հանդիպումը, իսկ վաղն առկա ձևաչափով տեղի կունենա ՀԱՊԿ արտաքին գործերի նախարարների խորհրդի, պաշտպանության նախարարների խորհրդի և անվտանգության խորհրդի քարտուղարների կոմիտեի հերթական համատեղ նիստը:
ՀԱՊԿ-ում ընդգրկված են Ռուսաստանը, Հայաստանը, Բելառուսը, Ղազախստանը, Ղրղզստանը և Տաջիկստանը։ 2022 թվականին կազմակերպության նախագահությունը ստանձնել էր Հայաստանը, հաջորդ տարի այն կնախագահի Բելառուսը։