ԵՐԵՎԱՆ, 21 նոյեմբերի – Sputnik. Արարատի մարզում կասեցվել է պահածոների արտադրամասի արտադրական գործունեությունը։ Տեղեկությունը հայտնում է ՀՀ սննդամթերքի անվտանգության տեսչական մարմնի մամուլի ծառայությունը։
Նշվում է, որ ստուգում է իրականացվել Արտաշատ քաղաքում գտնվող «ՏԳ Քոմփանի» ՍՊԸ-ին պատկանող պահածոների արտադրամասում, որի արդյունքում մի շարք խախտումներ են արձանագրվել։
«Ստուգմամբ պարզվել է, որ այս արտադրամասում ոչ միայն խախտվել են «Սննդամթերքի անվտանգության մասին» Մաքսային Միության տեխնիկական կանոնակարգով սահմանված բոլոր սանիտարահիգիենիկ, այլև արտադրական շինությունների նախագծմանը, դրանց կառուցվածքին, դասավորվածությանը և չափին ներկայացվող պահանջները»,– նշված է հաղորդագրության մեջ։
Չի ապահովվել արտադրամասի պաշտպանությունը կենդանիների, կրծողների և միջատների ներթափանցումից։ Նորոգված չեն եղել արտադրամասի և պահեստի հատակն ու պատերը։
Խախտումների վերացման համար համապատասխան ժամկետ է սահմանվել: