ԵՐԵՎԱՆ, 19 նոյեմբերի - Sputnik. Իսլամական Հանրապետության արևմուտքում գտնվող Քերմանշահ նահանգում տեղի ունեցած հարձակման ժամանակ սպանվել է Իսլամական հեղափոխության պահապանների կորպուսի (ԻՀՊԿ, իրանական զինված ուժերի էլիտար զորամասեր) հետախուզական ծառայության սպա։ Այս մասին հայտնել է իրանական IRNA գործակալությունը` հղում անելով տեղի պաշտոնյային։
Քերմանշահ քաղաքից (Իրանի արևմուտքում համանուն նահանգի վարչական կենտրոն) մոտ 60 կմ դեպի արևելք գտնվող Սախնե քաղաքի վարչակազմի ղեկավարի խոսքով` մի քանի ցուցարարներ ուրբաթ երեկոյան հարձակվել են ուժային կառույցների ներկայացուցիչների վրա:
Արդյունքում ԻՀՊԿ-ի հետախուզական ծառայության սպա է սպանվել։ Նշվում է, որ իրավապահ ուժերի աշխատակիցները ձերբակալել են հարձակվողներին։
Նշենք, որ Իրանում փողոցային բողոքի ցույցերը չեն հանդարտվում արդեն երկու ամիս։ Այդ ընթացքում երկրի մի շարք շրջաններում տեղի են ունեցել մի շարք հարձակումներ, որոնց զոհ են դարձել ինչպես իրանցի ուժայինները, այնպես էլ խաղաղ բնակիչները։
Նոյեմբերի 16–ին Խուզեստան նահանգի Իզե քաղաքի շուկայում իրականացված այդպիսի հարձակումներից մեկի հետևանքով յոթ մարդ է զոհվել: