Երևանում կայացել է ՀԱՊԿ անդամ պետությունների թմրամիջոցների անօրինական շրջանառության հակազդման իրավասու մարմինների ղեկավարների համակարգող խորհրդի 24-րդ նիստը։ Տեղեկությունը հայտնում է ՀՀ ոստիկանության մամուլի ծառայությունը։
Նիստին ներկա էին ՀՀ ոստիկանության պետ, ոստիկանության գեներալ-մայոր Վահե Ղազարյանը, ՀԱՊԿ գլխավոր քարտուղարի տեղակալ Վալերի Սեմերիկովը, ինչպես նաև ՀԱՊԿ անդամ պետությունների ներքին գործերի նախարարների տեղակալները, թմրամիջոցների անօրինական շրջանառության դեմ պայքարի ստորաբաժանումների ղեկավարները։
«Վահե Ղազարյանը բարձր է գնահատել խորհրդի աշխատանքը թմրամիջոցների անօրինական շրջանառության դեմ պայքարի ուղղությամբ։ Նա ընդգծել է համացանցի միջոցով թմրամիջոցների առուվաճառքի խնդիրը և նշել, որ քրեական ոստիկանության գլխավոր վարչության կազմում ստեղծվել է մասնագիտացված ստորաբաժանում, ինչի արդյունքում արդեն կան այդ կերպով թմրաշրջանառության դեպքերի բացահայտումներ»,– ասված է հաղորդագրության մեջ։
Վալերի Սեմերիկովն էլ անդրադարձել է թմրամիջոցների անօրինական շրջանառության դեմ պայքարի ուղղությամբ տարված աշխատանքներին։ Նա հատկապես կարևորել է ՀԱՊԿ անդամ երկրների տարածքում անցկացվող «Կանալ» հակաթմրանյութային միջոցառումը, որի շրջանակում հայտնաբերվել և առգրավվել են մեծ քանակությամբ տարբեր տեսակի թմրանյութեր։
ՀԱՊԿ գլխավոր քարտուղարի տեղակալի առաջարկությամբ խորհրդի նախագահ է ընտրվել ՌԴ ներքին գործերի նախարարի տեղակալ, ոստիկանության գեներալ-գնդապետ Անդրեյ Խրապովը։
Նիստի ընթացքում քննարկվել են 2022 թվականին ՀԱՊԿ անդամ երկրների տարածքում թմրամիջոցների հետ կապված իրավիճակի փոփոխության հիմնական միտումների, «Կանալ» հակաթմրանյութային գործողության, ՀԱՊԿ հիմնական գործունեության պլանի կատարման մասին հարցեր։
Խորհրդի նիստի ավարտին ընդունվել են նաև համապատասխան որոշումներ։