ԵՐԵՎԱՆ, 10 նոյեմբերի – Sputnik․ ՌԴ Պետդումայի ԱՊՀ գործերով կոմիտեի առաջին տեղակալ Կոնստանտին Զատուլինի՝ ՀՀ մուտք գործելու արգելքի հետ կապված հարցը քննարկվել է ՀՀ Ազգային ժողովում, կառավարությունում և ԱԳՆ-ում ՌԴ խորհրդարանականների պատվիրակության այսօրվա հանդիպումների ժամանակ։ Sputnik Արմենիա մուլտիմեդիոն մամուլի կենտրոնում տեղեկությունը հայտնեց ՌԴ Դաշնային ժողովի Պետական դումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կազբեկ Տայսաևը։
«Իհարկե, բոլոր հանդիպումների ժամանակ մենք բարձրացրել ենք Կոնստանտին Զատուլինի հետ կապված հարցը։ Հաշվի առնելով, որ մեր երկրների ղեկավարները Սոչիում կայացած հանդիպման արդյունքում հայտարարել են խորհրդարանական բաղադրիչի ամրապնդման անհրաժեշտության մասին` մենք այդ հարցը քննարկել ենք մեր գործընկերների հետ», - ընդգծեց Տայսաևը։
Նա հույս հայտնեց, որ հարցն արդեն մշակման փուլում է։ Տայսաևը վստահ է, որ առաջիկայում բոլոր խնդիրները կվերացվեն։
Հիշեցնենք, որ հոկտեմբերի 25-ին Կոնստանտին Զատուլինը նամակ էր ստացել ՀՀ ԱԺ–ից, որով նրան տեղեկացրել էին, որ իր մուտքը Հայաստանի Հանրապետություն անցանկալի է։ Զատուլինը պետք է հոկտեմբերի 28-ին Հայաստան գար` մասնակցելու իր հիմնադրած «Լազարևյան ակումբի» նիստին։ Հոկտեմբերի 27–ին ՌԴ ԱԳՆ խոսնակ Մարիա Զապարովան հայտարարեց, որ Մոսկվան Երևանից պարզաբանում է պահանջել Զատուլինի մուտքն արգելելու վերաբերյալ։