ԵՐԵՎԱՆ, 7 նոյեմբերի – Sputnik. Վայոց Ձորի մարզում դպրոց կա, որտեղ 7 տարի երեխաները ֆիզիկա չեն անցել։ Ազգային ժողովում 2023թ. պետական բյուջեի քննարկման ժամանակ տեղեկությունը հայտնեց ՀՀ կրթության, գիտության, մշակույթի և սպորտի փոխնախարար Ժաննա Անդրեասյանը։
«Նախորդ տարվանից փորձել ենք էլեկտրոնային ուսուցման միջոցով լուծում տալ խնդրին, սակայն բոլորս էլ գիտենք, որ սա լավագույն լուծումը չէ։ Ճիշտը ուսուցչի ֆիզիկական ներկայությունը դասարանում ապահովելն է։ Այդ իսկ պատճառով էլ որոշել ենք հավելավճար տրամադրել բնագիտական առարկաներ, ինչպես նաև ինֆորմատիկա դասավանդող այն ուսուցիչներին, որոնք փոքրաթիվ աշակերտ ունեցող դպրոցներում են աշխատում»,–ասաց Անդրեասյանը։
Նրա խոսքով` 20 տոկոս հավելավճար կտրամադրեն վերոհիշյալ ուսուցիչներին։ Անդրեասյանը հավելեց, որ ուսուցիչները կարող են նաև կամավոր ատեստավորվում անցնել և լրացուցիչ գումար էլ ստանալ։
Հիշեցնենք` ՀՀ վարչապետ Նիկոլ Փաշինյանը նոյեմբերի 2-ին Ազգային ժողովում 2023–ի պետական բյուջեի նախագծի քննարկման ժամանակ հայտնեց, որ կբարձրացնեն մինչև 100 աշակերտ ունեցող դպրոցներում աշխատող բնագիտական առարկաների այն ուսուցիչների աշխատավարձերը, որոնց դրույքաչափը պակաս է մեկ դրույքից, այսինքն` 90 000 դրամից պակաս ստացող ուսուցիչ չի լինի։ Փաշինյանը նշեց, որ բնագիտական առարկաներ դասավանդող 8135 ուսուցիչ հավելավճար կստանա։