Futuro Vegetal կազմակերպության երկու էկոակտիվիստներ իրենց սոսնձել են Մադրիդի Պրադոյի ազգային թանգարանում իսպանացի նկարիչ Ֆրանցիսկո Գոյայի նկարների շրջանակներին։ Տեղեկությունը սոցցանցերում հայտնել է շարժումը:
Կազմակերպության կողմից Twitter-ում հրապարակված տեսանյութից դատելով՝ երկու աղջիկներն իրենց ձեռքերը սոսնձել են Ֆրանցիսկո Գոյայի «Մերկ Մախա» և «Հագնված մախա» նկարների շրջանակներին, իսկ երկու նկարների միջև պատին սև ներկով գրել են «+1,5 աստիճան»:
Եվրոպայում վերջին շրջանում հաճախակի են դարձել բողոքի ակցիաները, որոնք կազմակերպում են ակտիվիստները՝ կլիմայի փոփոխության խնդրին ուշադրություն հրավիրելու նպատակով։
Այսպես` հոկտեմբերի 14-ին Լոնդոնում երկու աղջիկներ՝ Just Stop Oil բրիտանական էկոլոգիական շարժման մասնակիցներ, մտել են Ազգային պատկերասրահի սրահ ու Վան Գոգի «Արևածաղիկները» նկարի վրա լոլիկի ապուր լցրել։
Մեկ շաբաթ անց գերմանական Letzte Generation էկոլոգիական համայնքի երկու ակտիվիստներ կարտոֆիլի պյուրե են նետել Պոտսդամի Բարբերինիի թանգարանում (Գերմանիա) Կլոդ Մոնեի «Խոտի դեզ» նկարի վրա։
Նշենք, որ նոյեմբերի 6-18-ը Եգիպտոսում տեղի կունենա կլիմայի փոփոխության հարցերով ՄԱԿ-ի 27-րդ համաժողովը (COP 27): Ակտիվիստները կառավարություններին կոչ են անում քայլեր ձեռնարկել գլոբալ տաքացման դեմ պայքարելու և 2015 թվականի Փարիզի համաձայնագրում ամրագրված պարտավորությունները կատարելու համար: