ԵՐԵՎԱՆ, 1 նոյեմբերի – Sputnik. Լեռնային Ղարաբաղի կարգավիճակի հարցը արժե թողնել հաջորդ սերունդներին, երբ պայմաններ կստեղծվեն բոլոր կողմերի համար ընդունելի արդար որոշման համար։ Այս մասին «Պրիմակովյան ընթերցումների» շրջանակում լրագրողների հետ զրույցում պատասխանելով Ռուսաստանի դիրքորոշման մասին հարցին, ասաց Հայաստանում Ռուսաստանի արտակարգ և լիազոր դեսպան Սերգեյ Կոպիրկինը։
Դեսպանը նշել է, որ ՌԴ ղեկավարությունը բազմիցս հայտարարել է այս մասին։
«Կարգավորման ողջ համալիրը պետք է լինի Հայաստանի և Ադրբեջանի պայմանավորվածությունների արդյունք», – ասել է ՌԴ դիվանագետը։
Ինչ վերաբերում է խաղաղության պայմանագրին և դրա դրույթներին, դեսպանը կարծում է, որ դատելով Սոչիի հանդիպման արդյունքներից, կան հարցեր, որոնք դեռ համաձայնեցնել չի հաջողվում։ Սակայն այդ հարցերի շուրջ աշխատանքը կշարունակվի։
Հիշեցնենք` Հայաստանի վարչապետ Նիկոլ Փաշինյանը, Ռուսաստանի նախագահ Վլադիմիր Պուտինը և Ադրբեջանի նախագահ Իլհամ Ալիևը, հոկտեմբերի 31-ին հանդիպել են Սոչիում և քննարկել 2020 թվականի նոյեմբերի 9-ի, 2021 թվականի հունվարի 11-ի և նոյեմբերի 26-ի եռակողմ հայտարարությունների իրականացման ընթացքը։
Հանդիպման արդյունքում համատեղ հայտարարություն է ընդունվել, որում նրանք վերահաստատել են նշյալ բոլոր պայմանավորվածությունները խստորեն պահպանելու հանձնառությունը՝ ելնելով հայ-ադրբեջանական հարաբերությունների համապարփակ կարգավորման, Հարավային Կովկասում խաղաղության, կայունության, անվտանգության և կայուն տնտեսական զարգացման ապահովման շահերից։