ԵՐԵՎԱՆ, 31 հոկտեմբերի - Sputnik. Մահացել է ՀՀ ժողովրդական արտիստ, բեմադրիչ Վահե Շահվերդյանը։ Նա 77 տարեկան էր։ Տեղեկությունը ֆեյսբուքյան իր էջում հայտնել է ՀՀ ԿԳՍՄ փոխնախարար Արա Խզմալյանը։
Վահե Շահվերդյանը ծնվել է 1945թ. օգոստոսի 19-ին Վանաձորում: 1971թ. Նա ավարտել Է Երևանի գեղարվեստաթատերական ինստիտուտի ռեժիսորական ֆակուլտետը` Ռաֆայել Ջրբաշյանի արվեստանոցը:
Արդեն 1973-96թթ եղել է Վանաձորի թատրոնի գեղարվեստական ղեկավարը: 1992թ-ից Շահվերդյանը դասավանդել է Երևանի թատրոնի և կինոյի պետական ինստիտուտում, 1994-98թթ-ին` եղել է ռեկտորը (2003թ-ից` պրոֆեսոր):
12 տարիի շարունակ`1996-2008թթ, անվանի բեմադրիչը եղել է Երևանի Գ.Սունդուկյանի անվան ազգային ակադեմիական թատրոնի տնօրենն ու գեղարվեստական ղեկավարը:
2008թ-ից վերադարձել է Վանաձորի Հ.Աբելյանի անվան դրամատիկական թատրոն, որտեղ ղեկավարել է գեղարվեստական մասը:
Նրա ստեղծած բեմադրություններից են` Մ.Մետերլինկի «Կապույտ թռչուն» (1980թ.), Ա.Չեխովի «Երեք քույր» (1987թ.), Ռ.Հակոբջանյանի «Նոյի ժառանգները» (1991թ.), Ա.Օստրովսկու «Անմեղ մեղավորներ» (1993թ.), Մ.Կոլտեսի «Ռոբերտո Զուկկո» (1995թ.), Լ.Շանթի «Հին աստվածներ» (1999թ.), Գ.Լորկայի «Բեռնարդա Ալբայի տունը» (2001թ.), Ա.Շիրվանգադեի «Պատվի համար» և այլն: 1995-99թթ Շահվերդյանը եղել է ՀՀ Աժ պատգմավոր:
1996թ. պարգևատրվել է ՀՀ «Մովսես Խորենացի», 2005թ.` ՀՀ կրթության և գիտության, 2006թ.` մշակույթի նախարարությունների և ԵՊՀ ոսկե մեդալներով:
2016թ.-ին Շահվերդյանը «Հայրենիքին մատուցած ծառայությունների համար» 2-րդ աստիճանի շքանշանի է արժանացել:
Վահե Շահվերդյանը բեմադրիչ, հաղորդավար Սուրեն Շահվերդյանի հայրն է։