ԵՐԵՎԱՆ, 27 հոկտեմբերի - Sputnik. Ավարտվել է Արցախյան 44-օրյա պատերազմի ընթացքում զորամասի հրամանատարի տեղակալի կողմից մարտադաշտն ինքնակամ լքելու դեպքի վերաբերյալ նախաքննությունը։ Առերևույթ հանցանքի կատարման համար նրան մեղադրանք է առաջադրվել ՀՀ քրեական օրենսգրքի 380-րդ հոդվածի 1-ին մասով (Մարտի ժամանակ մարտադաշտն ինքնակամ լքելը կամ զենքով գործելուց հրաժարվելը, որը պատժվում է ազատազրկմամբ՝ 8–12 տարի ժամկետով)։ Տեղեկությունը հայտնում է ՀՀ քննչական կոմիտեի մամուլի ծառայությունը։
Պարզվել է, որ 44–օրյա պատերազմի ընթացքում N զորամասի հրամանատարի առաջին տեղակալ Մ․Մ-ն, հանդիսանալով զորամասի ողջ անձնակազմի ուղղակի պետը, 2020թ. հոկտեմբերի 13-ին Վարանդայում տեղակայված զորամասում տեղեկանալով բնակավայրի արևմտյան կողմում գտնվող Կավաք բարձունքի վրա հակառակորդի զինծառայողների ներթափանցման մասին, նույն զորամասի հրամանատարի տեղակալներ Ա.Ա.-ի, Լ.Պ.-ի և երկու զինծառայողների հետ միասին վերջիններիս ավտոմեքենայով գնացել է նշված բարձունքի ուղղությամբ:
«Չհասած Կավաք բարձունքին` Վարանդա-Տող ավտոճանապարհի և Ակնաղբյուր տանող ճանապարհի խաչմերուկում, կանգնեցրել են ավտոմեքենան, որից հետո սկսել են տեղանքում դիտարկում կատարել և տեսել հակառակորդի բարձրացող զինծառայողների: Իրենց ուղղությամբ բարձրացող զինծառայողներին տեսնելով` հակառակորդին դիմադրություն ցույց տալու նպատակով հրամանատարների տեղակալներ Լ.Պ.-ն և Ա.Ա.-ն դիրքավորվել և կրակ են վարել հակառակորդի ուղղությամբ, իսկ Մ․Մ -ն հայտնել է, որ վերադառնում է զորամասի մշտական տեղակայման վայր` օգնական ուժեր բերելու պատրվակով»,- նշված է հաղորդագրության մեջ:
Այնուհետև Մ.Մ.-ն պահեստազորից զորակոչված երկու զինծառայողների հետ միասին ուղևորվել է դեպի զորամասի մշտական տեղակայման վայր, սակայն զորամասից շուրջ 500 մետր հեռավորության վրա պահանջել է կանգնեցնել ավտոմեքենան, որից դուրս գալուց հետո թաքնվել է ինչ-որ շինությունում։
Զորամասի մշտական տեղակայման վայր չգնալով` Մ․Մ-ն զանգահարել է Լ.Պ.-ին և հայտնել, իբր մշտական տեղակայման վայրում գտնվող զինծառայողները հրաժարվել են նրանց օգնության գնալ։
Մեկ օր մնալով թաքստոցում, նա գնացել է Մարտունու շրջանի` հակառակորդի առաջխաղացման հակառակ ուղղությամբ:
ՔԿ–ից հայտնում են, որ քրեական վարույթի նախաքննությամբ հավաքված ապացույցները գնահատելով և հանգելով հետևության, որ մեղադրյալին վերագրվող հանցանքի համար նրա դատապարտումը մեծապես հավանական է՝ հայտարարվել է քրեական վարույթով նախաքննության ավարտի մասին ու կազմվել մեղադրական եզրակացություն՝ այն քրեական վարույթի նյութերի հետ միասին հսկող դատախազին հանձնելու և նրա հաստատմամբ դատարան ուղարկելու նպատակով: