ԵՐԵՎԱՆ, 26 հոկտեմբերի – Sputnik. Երևանի «Սուրմալու» առևտրի կենտրոնում օգոստոսի 14-ին տեղի ունեցած պայթյունից հետո տուժած քաղաքացիներից 12-ը դիմել է ՀՀ աշխատանքի և սոցիալական հարցերի նախարարություն` աջակցություն ստանալու նպատակով։ Այս մասին ԱԺ-ում կառավարության հետ հարցուպատասխանի ժամանակ հայտնեց աշխատանքի և սոցիալական հարցերի նախարար Նարեկ Մկրտչյանը։
«Նախարարությունը մշակած ծրագրով նախատեսվել է 50 մլն դրամ բյուջե, որպեսզի դրամական աջակցություն տրամադրվեր զոհերի, անհետ կորած համարվող քաղաքացու ընտանիքներին և վիրավորում ստացածներին»,– նշեց Մկրտչյանը։
Ընդհանուր առմամբ վիրավորվել է 24 անձ, որից 17-ը ստացել է 150.000–ական դրամ, 7-ը` 300.000–ական դրամ, 16 զոհված–ի յուրաքանչյուր ընտանիքին էլ տրվել է 3 մլն դրամ։
«Նախագիծն ընդունվելուց հետո քաղաքացիները պետք է դիմեին մեր նախարարություն, ինչի հիման վրա մենք աջակցություն տրամադրեինք նրանց։ Այս պահի դրությամբ դիմել է 12 հոգի, ծրագիրը դեռ բաց է և հընթացս դիմումներն ընդունվում են»,– նշեց նախարարը։
Հիշեցնենք, որ դեռ օգոստոսի 24-ին էկոնոմիկայի նախարար Վահան Քերոբյանը հայտարարել էր, որ «Սուրմալուի» տնտեսվարողները կառավարությունից փոխհատուցում չեն ստանա։ Նա նշել էր, որ եթե «Սուրմալուում» աշխատող գործարարներն ապահովագրած լինեին իրենց գույքը, ապա կրած վնասների դիմաց փոխհատուցում կստանային։
«Սուրմալու» առևտրի կենտրոնում պայթյուն էր տեղի ունեցել օգոստոսի 14-ին՝ մոտավորապես 13։23-ին, որի հետևանքով 16 մարդ մահացել էր, մեկ մարդ համարվում է անհետ կորած։