Ընդամենը փոխել եմ աշխատավայրս. Գյումրու նախկին փոխքաղաքապետը պատգամավոր դարձավ

Դավիթ Առուշանյանը. Արխիվային լուսանկար
Առուշանյանը խորհրդարանում կփոխարինի «Քաղաքացիական պայմանագիր» խմբակցության արդեն նախկին պատգամավոր Վահագն Հովակիմյանին։
Sputnik
ԵՐԵՎԱՆ, 25 հոկտեմբերի – Sputnik. Գյումրու համայնքի ղեկավարի տեղակալ Դավիթ Առուշանյանը պատգամավորական մանդատ ստացավ։ Այս մասին այսօր ԱԺ նիստում հայտարարեց նիստը վարող ԱԺ փոխնախագահ Ռուբեն Ռուբինյանը։
Առուշանյանը խորհրդարանում կփոխարինի «Քաղաքացիական պայմանագիր» խմբակցության արդեն նախկին պատգամավոր Վահագն Հովակիմյանին, ով օրեր առաջ ընտրվել էր ԿԸՀ նախագահ։
«ԿԸՀ-ն ներկայացրել է ԱԺ պատգամավորի լիազորությունները դադարեցրած մանդատը հաջորդ թեկնածուին տրամադրելու մասին արձանագրությունը, ըստ որի մանդատը տրվում է ՔՊ ընտրական ցուցակի հերթական հաջորդ թեկնածու Դավիթ Առուշանյանին»,– ասաց Ռուբինյանը` նորընտիր պատգամավորին հրավիրելով ամբիոնի մոտ` երդվելու։
Երդման տեքստն արտասանելուց հետո գյումրեցի պատգամավորը հատուկ շնորհակալություն հայտնեց համաքաղաքացիներին ու վստահեցրեց. «Ես քաղաքից չեմ գնացել, ընդամենը փոխել եմ աշխատանքիս վայրը։ Նպատակներս մնացել են նույնը»։
Առուշանյանը հայտարարեց, որ ամեն ինչ անելու է Գյումրիում կիսատ թողած ծրագրերն ավարտելու համար։
Հոկտեմբերի 10–ին հայտնի դարձավ, որ Դավիթ Առուշանյանը Գյումրու փոխքաղաքապետի պաշտոնից ազատման դիմում է գրել։ Նա գրել էր, որ այսուհետ իր գործունեությունը շարունակելու է Ազգային ժողովում։