ԵՐԵՎԱՆ, 22 հոկտեմբերի – Sputnik, Խաչիկ Չախոյան. Ծանրորդներ Արա Աղանյանը, Գարիկ Կարապետյանը և Լիանա Գյուրջյանն այսօր ալբանական Դյուրես քաղաքում իրենց հավասարը չունեցան. վստահ հաղթանակ տանելով՝ նրանք նվաճեցին Եվրոպայի չեմպիոնի կոչումը իրենց տարիքային խմբերում։
Մրցումային օրվա ընթացքում առաջինը Հայաստանի հավաքականից մրցահարթակ դուրս եկան Լիանա Գյուրջյանն ու էմմա Պողոսյանը։ Մ20 մրցաշարի կանանց 81 կգ քաշային կարգում Գյուրջյանը, երկամարտում գրանցելով 223 կգ (98+125) արդյունք, նվաճեց Եվրոպայի չեմպիոնի տիտղոսը, իսկ Պողոսյանը երկամարտի 215 կգ (94+121) արդյունքով դարձավ փոխչեմպիոն:
Լիանա Գյուրջյանը հաջող կատարեց բոլոր մոտեցումները՝ հաղթելով նաև պոկում ու հրում վարժություններում: Այսինքն՝ նվաճեց նաև փոքր ոսկե մեդալները։
Մեր հավաքականի հաղթական տեմպը պահպանեց Գարիկ Կարապետյանը։ Մ20 մրցաշարում հայ ըմբիշը պայքարից դուրս էր 96 կգ քաշային կարգում: Նա ոսկե մեդալ նվաճեց երկամարտի 367 կգ (171+196) արդյունքով՝ հաղթելով նաև պոկում ու հրում վարժություններում:
Երկրորդ տեղը գրաված թուրք ծանրորդ Օզթուրք Էմրեն երկամարտում 27 կգ զիջեց Գարիկ Կարապետյանին: Բացի այդ, թուրք մարզիկը սադրեց մեր ծանրորդին ու թեթև հրմշտոց տեղի ունեցավ մարզիկների միջև, բայց միջադեպն արագ հարթվեց։
Մ23 ծանրորդների 96 կգ քաշային կարգում Եվրոպայի չեմպիոնի կոչումը նվաճեց Արա Աղանյանը։Հայ ծանրորդը ոսկե մեդալ նվաճեց երկամարտի 363 կգ (168+195) արդյունքով՝ հաղթելով նաև պոկում ու հրում վարժություններում:
Հայաստանի հավաքական թիմերը երկամարտում մեդալների թիվը հասցրին 9-ի:
Հիշեցնենք՝ Հայաստանը Եվրոպայի մինչև 20 և 23 տարեկանների առաջնությանը մասնակցում է 23 ծանրորդով։