Ցեմենտի դեֆիցիտը կարող է արհեստական ստեղծված լինել. ՄՊՀ նախագահ

ԵՐԵՎԱՆ, 20 հոկտեմբերի - Sputnik. Հայաստանում ցեմենտի շուկայում ստեղծված իրավիճակը կարող է արհեստական դեֆիցիտի հետևանք լինել։ Այս մասին այսօր ՀՀ կառավարության նիստում հայտարարեց ՀՀ մրցակցության պետական հանձնաժողովի նախագահ Գեղամ Գևորգյանը։

ՄՊՀ նախագահը նշեց, որ վարույթ այս հարցով դեռևս չի հարուցվել, բայց ամենայն հավանականությամբ կհարուցվի։

«Դե հարուցեք»,– հանձնարարեց վարչապետ Փաշինյանը` հավելելով, որ դա կնշանակի, որ ցեմենտի վաճառքի խնդիր Հայաստանում չկա, պարզապես վաճառողներն այդ կերպ փորձում են ավելի մեծ շահույթներ ստանալ։

Արդեն շուրջ մեկ ամիս կառավարությունը հայտարարում է հայաստանյան ցեմենտի շուկայում ստեղծված դեֆիցիտի ու դրա հետևանքով` գների թանկացման մասին։

50 կգ–անոց 1 պարկ տեղական արտադրության ցեմենտն այժմ վաճառվում է 2 900 դրամով, իրանականը` 3 000-3 500։

Իշխանությունները վստահ են, որ այս իրավիճակը ստեղծվել է իրանական ցեմենտի ինքնարժեքի բարձրացման ու Հայաստանում դրա նկատմամբ կիրառվող լրացուցիչ տուրքերի հետևանքով։

Իրավիճակի շտկման համար «Քաղաքացիական պայմանագիր» խմբակցության պատգմավորներն օրենսդրական առաջարկ էին արել ներկրված 1 տոննա ցեմենտի դիմաց գործող 14 000 դրամ տուրքը 7 անգամ նվազեցնել` թողնելով 2 000 դրամ, իսկ ցեմենտի հումքի` կլինկերի 1 տոննայի դիմաց գործող 2 000 դրամ տուրքն ընդհանրապես վերացնել։

Նախագծն արդեն ընդունվել ու ուժի մեջ է մտել։

Ներկրվող ցեմենտի դիմաց տուրքը սահմանվել էր 2019թ–ին` տեղական արտադրողներին պաշտպանելու նպատակով։ 2021 թվականի մայիսից նույն հիմնավորմամբ պետտուրք սահմանվել էր նաև ցեմենտի հումքի` կլինկերի ներկրման համար։