ԵՐԵՎԱՆ, 18 հոկտեմբերի – Sputnik. Ադրբեջանի ագրեսիայի հետևանքով ՀՀ երեք մարզերում իրենց բնակավայրերից տեղահանված բնակիչների 90 տոկոսը վերադարձել են իրենց բնակության վայրեր։ Այս մասին Sputnik Արմենիայի հետ հարցազրույցում հայտնեց ՀՀ տարածքային կառավարման և ենթակառուցվածքների նախարար Գնել Սանոսյանը։
Նախարարը նշեց, որ սեպտեմբերին ՀՀ ինքնիշխան տարածքի նկատմամբ Ադրբեջանի վերջին ագրեսիայի հետևանքով քաղաքացիական ենթակառուցվածքներին հասցված վնասները գույքագրել են։
Դրանց որոշ մասը, որ հնարավոր է եղել տեղական ուժերով ու կառավարության հատկացրած միջոցներով կարգավորել, արդեն կարգավորվել են։ Իսկ խոշոր վնասների մասով աշխատանքները շարունակվում են։
Թե Հայաստանին ու հայաստանցիներին ֆինանսական ինչ ծավալի վնաս է հասցվել Ադրբեջանի հարձակման արդյունքում, Սանոսյանը դժվարացավ հայտնել` ասելով, որ վնասի գումարային հաշվարկը դեռ չի ավարտվել։
«Կան վնասված ենթակառուցվածքներ, որոնք ամբողջովին վերանորոգելու, հիմնանորոգելու կամ նորերը կառուցելու կարիք կա։ Մենք այդ ամբողջ պատկերն ունենք։ Հիմա և՛ մենք, և՛ մարզպետարանները, և՛ քաղաքաշինության տեսչությունն ու մյուս գործընկերներն աշխատում ենք այդ ուղղությամբ։ Որտեղ նոր բնակարաններ կառուցելու կարիք կա, կկառուցվեն»,– ասաց Սանոսյանը։
Անդրադառնալով Սյունիքի մարզում վերջին ագրեսիայի հետևանքով առաջացած խնդիրներին, ինչպես նաև 2020 և 2021թ–ներին թշնամու առաջխաղացմանը, մասնավորապես Ներքին Հանդ գյուղում ի հայտ եկած դժվարություններին` նախարար Սանոսյանը շեշտեց, որ կառավարությունը փորձում է այդ խնդիրներին ժամանակավոր լուծումներ գտնել` այն համոզմունքով, որ հակառակորդի ուժերը վաղ թե ուշ պետք է դուրս գան ՀՀ ինքնիշխան տարածքից ու նաև այդ հատվածից։
«Սահմանամերձ բնակավայրեր կան, որոնք դեռ 2020 թ–ից հետո դժվարություններ ունեն, որովհետև գյուղացիները որոշ հատվածներում կորցրել են աշխատելու և գյուղատնտեսությամբ զբաղվելու հնարավորությունը` հաշվի առնելով, որ այդ տարածքները դարձել են նաև դիտարկվող։ Կան որոշ պետական ծրագրեր, որ հատկապես այդ հատվածներում պետք է հնարավորինս ակտիվ իրականացնել` աշնանացան ցորենի ձեռքբերումից մինչև անասունների ձեռքբերում, որպեսզի մեր հայրենակիցները կարողանան շարունակել գյուղատնտեսությամբ զբաղվել»,–ասաց նա։
Նախարարը նկատեց, որ այդ խնդիրների, այդ դժվարությունների մեջ էլ, չափազանց բարդ իրավիճակում հայտնվելուց հետո, այնուամենայնիվ մեր ժողովուրդը շատ ամուր է այնտեղ, հաստատակամ, նվիրված իրենց համայնքին, իրենց տարածաշրջանին։ Խոստովանեց, որ ամեն անգամ Սյունիք այցելելուց հետո Սյունիքն ավելի է սիրում։
Ամբողջական հարցազրույցը կարող եք դիտել այստեղ։