ԵՐԵՎԱՆ, 17 հոկտեմբերի – Sputnik. Նավաշինության ասպարեզում միջուկային էներգետիկայի անվտանգության խնդիրների ականավոր մասնագետ, Հայրենական մեծ պատերազմի վետերան և Ռուսաստանի գիտությունների ակադեմիայի ակադեմիկոս Աշոտ Սարկիսովը մահացել է հոկտեմբերի 17-ին, 98 տարեկան հասակում։
«Այսօր մահացել է Աշոտ Առաքելի Սարկիսովը»,– ՌԻԱ Նովոստիին է հայտնել գիտնականի մերձավորներից մեկը։
Աշոտ Սարկիսովը մշակել է արտակարգ իրավիճակներում նավաշինական էներգետիկայի սարքերի շահագործման համար բնորոշ դինամիկ գործընթացների տեսությունը, այդ թվում՝ արտաքին ուժեղ հարվածների ազդեցության պարագայում։
Նրա մասնակցությամբ իրականացվել են ուսումնասիրություններ, որոնց արդյունքները թույլ են տվել որակապես բարելավել միջուկային էներգետիկ սարքերի բնութագրերը և բարձրացնել ռազմածովային նավատորմի նավերի մարտական արդյունավետությունը։
1983 թվականին Սարկիսովը նշանակվել է Գրեչկոյի անվան ռազմածովային ակադեմիայի ղեկավարի գիտական գծով տեղակալ, 1985 թվականին` ԽՍՀՄ ՌԾՆ գիտատեխնիկական կոմիտեի նախագահ։ 1989 թվականին պաշտոնաթող է եղել։
Թոշակի անցնելուց հետո Սարկիսովը պարգևատրվել է Կարմիր աստղի 3, «Հայրենական պատերազմի» 1-ին և 2-րդ աստիճանի, «Պատվո նշան», Հայրենիքին ծառայության համար 2-րդ, 3-րդ և 4-րդ աստիճանի, ԽՍՀՄ զինված ուժերում հայրենիքին ծառայելու համար 3-րդ աստիճանի և Պատվո շքանշաններով։
2014 թվականին Սարկիսովն ատոմային էներգետիկայի զարգացման մեջ ունեցած ներդրումի, դրա անվտանգության բարձրացման և արկտիկական գոտու ռադիացիոն և բնապահպանական խնդիրների լուծման համար արժանացել է «Գլոբալ էներգիա» միջազգային մրցանակի։