Մոլդովայի մայրաքաղաքում ընդդիմադիր ուժերն անժամկետ բողոքի ակցիա են անցկացնում։ Խորհրդարանի շենքի դիմաց ցուցարարները կազմակերպել են վրանային «Փոփոխությունների քաղաք»։ Sputnik Մոլդովայի հաղորդմամբ՝ ցուցարարները պահանջում են Մոլդովայի նախագահ Մայա Սանդուի, խորհրդարանի և կառավարության հրաժարականները, ինչպես նաև արտահերթ ընտրությունների անցկացում։
Այսօր մայրաքաղաք Քիշնևում ցուցարարներ են հավաքվել երկրի տարբեր շրջաններից՝ բողոքի զանգվածային ակցիա անցկացնելու համար։ Կազմակերպիչների տվյալներով ՝ հանրահավաքին մասնակցում է ավելի քան 50 հազար մարդ։
Մեկ շաբաթ առաջ ցուցարարները հայտարարություն էին ընդունել, որով իշխանություններից պահանջել էին շտապ կարգով ամբողջությամբ փոխհատուցել բնական գազի և էլեկտրաէներգիայի սակագնի տարբերությունը, ինչպես նաև ֆինանսական օգնություն տրամադրել բնակչության առավել խոցելի խմբերին: