ԵՐԵՎԱՆ, 14 հոկտեմբերի – Sputnik. Իլոն Մասկին պատկանող «SpaceX» ընկերությունը ԱՄՆ իշխանություններին հայտնել է, որ այլևս չի կարող վճարել Ուկրաինայի համար շատ կարևոր արբանյակային ծառայությունների համար։ Տեղեկությունը հայտնում է CNN-ը:
«Starlink» արբանյակները Ուկրաինայի զինվորականների համար կապի կարեւոր աղբյուր են։ Դրանք թույլ են տալիս մարտի դաշտում կապի մեջ մնալ նույնիսկ այն ժամանակ, երբ բջջային կապն ու ինտերնետային ցանցը խափանված են։
Այս պահին Ուկրաինային է փոխանցվել «Starlink»-ի շուրջ 20 հազար արբանյակ։ Իլոն Մասկը թվիթերյան իր էջում գրել է. ««SpaceX»-ի համար այս ամենն արժեցել է 80 մլն դոլար, մինչև տարեվերջ ծախսերը կգերազանցեն 100 մլն դոլարը»:
«SpaceX»-ը Պենտագոնին զգուշացրել է, որ կարող է դադարեցնել Ուկրաինայում ծառայության ֆինանսավորումը, եթե ամերիկացի զինվորականները դրա համար ամեն ամիս տասնյակ միլիոնավոր դոլարներ չհատկացնեն։
CNN-ի ձեռք բերած փաստաթղթերում երևում է, որ անցյալ ամիս «SpaceX»–ը նամակ է ուղարկել Պենտագոնին, որտեղ ասվում է, որ այլևս չի կարող ֆինանսավորել «Starlink» ծառայությունը: Ընկերությունը խնդրել է Պենտագոնին իր վրա վերցնել «Starlink»-ի ֆինանսավորումը։
«SpaceX»-ը նշել է, որ ծառայության արժեքը մինչև տարեվերջ ավելի քան 120 միլիոն դոլար կդառնա, իսկ առաջիկա 12 ամիսներին այն կարող է շուրջ 400 միլիոն դոլար արժենալ: