ԵՐԵՎԱՆ, 13 հոկտեմբերի — Sputnik. ՆԱՏՕ-ն Ուկրաինայի հակամարտության կողմ չէ, սակայն կշարունակի աջակցել Կիևին, քանի դեռ դա անհրաժեշտ է։ Տեղեկությունը, ՌԻԱ Նովոստիի փոխանցմամբ՝ հայտնել է կազմակերպության գլխավոր քարտուղար Յենս Ստոլտենբերգը:
«ՆԱՏՕ-ի դաշնակիցները ժամանակակից համակարգեր են մատակարարում, ներառյալ` հրետանի, ՀՕՊ ու զրահատեխնիկա», - ասել է Ստոլտենբերգը՝ ամփոփելով դաշինքի երկրների պաշտպանության նախարարների նիստի արդյունքները:
Նա նաև շնորհակալություն է հայտնել ՆԱՏՕ-ի բոլոր անդամներին, որոնք «զգալի ներդրում են ունեցել» Ուկրաինային աջակցելու գործում ու կոչ է արել նրանց շարունակել աջակցությունը:
Ստոլտենբերգը նշել է, որ ՆԱՏՕ-ն կօգնի Ուկրաինային ձմռանը գործողություններ իրականացնելու համար:
«Մենք տրամադրում ենք վառելիք, ձմեռային հագուստ և անհրաժեշտ ամեն ինչ։ Մեր խնդիրն է օգնել Ուկրաինային նշանակալի գործողություններ իրականացնել ձմռան ընթացքում», - ասել է նա։
Ընդ որում, Ստոլտենբերգն առաջարկել է լրագրողներին, որոնք հարցրել են, թե ինչպե՞ս է Կիևը պատրաստվում ձմռանը կռվել, հենց Ուկրաինայից դա ճշտել։
Ավելի վաղ Ուկրաինային սպառազինություն մատակարարելու հետ կապված Մոսկվան նոտա էր հղել ՆԱՏՕ–ի երկրներին։ ՌԴ ԱԳՆ ղեկավար Սերգեյ Լավրովը նշել էր, որ ցանկացած բեռ, որը Ուկրաինայի համար զենք կպարունակի, Ռուսաստանի համար օրինական թիրախ կդառնա։
ՌԴ արտգործնախարարությունում հայտարարել են, որ ՆԱՏՕ–ի երկրները «կրակի հետ են խաղում»` զենք մատակարարելով Ուկրաինային։ ՌԴ նախագահի մամուլի քարտուղար Դմիտրի Պեսկովը նշել էր, որ Արևմուտքի կողմից Ուկրաինային զենքով զինումը ռուս–ուկրաինական բանակցությունների հաջողությանը չի նպաստում։