ԵՐԵՎԱՆ, 11 հոկտեմբերի – Sputnik. Հայաստանի արտաքին գործերի նախարարությունը վստահեցնում է, որ Պրահայի հանդիպումից հետո տարածված հայտարարությունից հետո Ադրբեջանի հետ բանակցություններում որևէ զարգացում չկա։ ՀՀ ԱԳՆ մամուլի քարտուղար Վահան Հունանյանը Sputnik Արմենիայի հետ զրույցում մեկնաբանեց Թուրքիայի արտաքին գործերի նախարար Մևլութ Չավուշօղլուի հայտարարությունը։
Չավուշօղլուն թուրքական Tvnet հեռուստաընկերությանն ասել է, որ Հայաստանն ու Ադրբեջանը համաձայնության են եկել խաղաղության պայմանագրի հիմնական սկզբունքների շուրջ, պայմանավորվածություն են ձեռք բերել, մնում է միայն դրանք իրականացնել։
«Ադրբեջանի հետ բանակցությունները շարունակվում են, և Պրահայի հանդիպումից հետո տարածված հայտարարությունից հետո այս առումով որևէ զարգացում չկա: Նոր զարգացումների դեպքում, ինչպես և նախկինում, հանրությանը պատշաճ կերպով տեղյակ կպահենք»,- ասաց Վահան Հունանյանը:
Հիշեցնենք, որ հոկտեմբերի 6-ին ՀՀ վարչապետը Պրահայում մասնակցել է Եվրոպական քաղաքական համայնքի գագաթնաժողովին, քառակողմ հանդիպում ունեցել Ֆրանսիայի նախագահ Էմանուել Մակրոնի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի մասնակցությամբ, մասնակցել է Էրդողան–Ալիև ոչ ֆորմալ հանդիպմանը, առանձնազրույց ունեցել Թուրքիայի նախագահ Էրդողանի հետ։
Քառակողմ հանդիպման ժամանակ Հայաստանն ու Ադրբեջանը հաստատել են իրենց հանձնառությունը ՄԱԿ-ի կանոնադրությանը և 1991թ. Ալմա Աթայի հռչակագրին, որոնց միջոցով երկու կողմերն էլ ճանաչում են միմյանց տարածքային ամբողջականությունն ու ինքնիշխանությունը: