Ռուսաստանը Երևանի և Բաքվի հետ կշարունակի աշխատել եռակողմ ձևաչափով. Կոպիրկին

ԵՐԵՎԱՆ, 5 հոկտեմբերի – Sputnik. Ռուսաստանը կշարունակի աշխատել Հայաստանի և Ադրբեջանի հետ եռակողմ ձևաչափով, Sputnik Արմենիայի հարցին ի պատասխան ասաց Հայաստանում Ռուսաստանի դեսպան Սերգեյ Կոպիրկինը։

Նրա խոսքով` բավականին շատ բան է հայտնի այն մասին, թե ինչ է անում Ռուսաստանը հայ–ադրբեջանական սահմանին լարվածությունը թուլացնելու համար։ Կան եռակողմ մեխանիզմներ, որոնք հայտնի են և հիմնված են 2020 և 2021 թվականների պայմանավորվածությունների վրա։

Նա նշեց, որ ռուսական ներկայություն կա նաև հայ–ադրբեջանական սահմանի խնդրահարույց հատվածներում։ Ռուսաստանի Դաշնության խաղաղապահները, սահմանապահները կապի մեջ են երկու կողմերի հետ, աշխատում են։ Իսկ դա կարևոր գործոն է կայունության պահպանման և իրավիճակի հետագա սրացումը կանխելու համար։

«Կա մշտական քաղաքական երկխոսություն և՛ երկկողմ, և՛ եռակողմ: Դա շատ ամուր է, վստահելի, կա բնական և սերտ շփում ամենաբարձր մակարդակով: Սա միջոցառումների մի ամբողջ շարք է, որի նպատակն է այնպես անել, որ իրավիճակը չվատանա և անհրաժեշտ պայմանավորվածություններին հասնելու ուղղությամբ առաջխաղացում լինի»,- ասաց Կոպիրկինը։

Պատասխանելով ՀԺ–ի աղմկահարույց հոդվածի մասին հարցին՝ Կոպիրկինը նշեց, որ ՌԴ նախագահի մամուլի քարտուղարն արդեն մեկնաբանել է այն, ուստի ավելացնելու ոչինչ չկա։

Հիշեցնենք` ՀՀ վարչապետ Նիկոլ Փաշինյանի ընտանիքին պատկանող «Հայկական ժամանակ» թերթը, որի գլխավոր խմբագիրը Հայաստանի վարչապետի կինն է, երկու օր անընդմեջ հրապարակումներ էր անում` հղում անելով «հավաստի աղբյուրին»։ Թերթը առաջին նյութում շարադրել էր, թե ինչ է պահանջում Ադրբեջանը Հայաստանից, իսկ երկրորդում գրել էր, թե Ռուսաստանը ցանկանում է, որ Հայաստանը «Ռուսաստան–Բելառուս» միութենական պետության կամ Ռուսաստանի մաս կազմի։ Գրառումն արդեն մեկնաբանել են Կրեմլում։ Ռուսաստանի նախագահի մամուլի խոսնակ Դմիտրի Պեսկովը դա ակնհայտ անհեթեթություն է որակել։