Եթե չաշխատեց, ուրեմն այդ մեխանիզմը չկա. ԱԺ նախագահը` ՀԱՊԿ–ի մասին

Ալեն Սիմոնյան. Արխիվային լուսանկար
Սիմոնյանն ասել է, որ իրենց քաղաքական թիմի համար Հայաստանի անվտանգությունը գերագույն նպատակ է, և իրենք այն ապահովելու են բոլոր հնարավոր միջոցներով։
Sputnik
ԵՐԵՎԱՆ, 30 սեպտեմբերի – Sputnik. Պետք է ստիպենք ՀԱՊԿ մեխանիզմը աշխատի, եթե չաշխատեց, ուրեմն այդ մեխանիզմը չկա: Այս մասին «Ա1+»-ի հարցին ի պատասխան ասել է ՀՀ Ազգային Ժողովի նախագահ Ալեն Սիմոնյանը։
Լրագրողը խորհրդարանի ղեկավարից նաև հետաքրքրվել է, թե որքանով են իրական այն մտահոգությունները, թե ՀԱՊԿ–ի անդամ երկիր լինելը Հայաստանի համար խոչընդոտ է որոշ պետություններից զենք գնելու համար։
«Մենք զբաղվում ենք ձեր նշած խնդրով, և ակնհայտ է, որ միայն մի տեղից զենքի մասով հույս չենք դնում, առավել ևս, որ հիմա պարզ պատճառներով խնդիրներ կան և ձեր հնչեցրած մտահոգությունը մենք գիտենք։ Այդ տրամաբանության մեջ փորձում ենք կառուցել մեր անվտանգային համակարգը»,– պատասխանել է Սիմոնյանը։
Նա նաև հայտարարել է, որ իրենց քաղաքական թիմի համար Հայաստանի անվտանգությունը գերագույն նպատակ է, և իրենք այն ապահովելու են բոլոր հնարավոր միջոցներով, իսկ թե ում միջոցով կարվի՝ բացարձակ կարևոր չէ։
Հիշեցնենք՝ ՀԱՊԿ առաքելությունը Հայաստան էր ժամանել Հավաքական անվտանգության խորհրդի սեպտեմբերի 13-ի արտահերթ նիստի որոշման համաձայն: Այցի ընթացքում նրանք հանդիպել էին Հայաստանի ղեկավար կազմի հետ և այցելել հայ-ադրբեջանական սահման։
Ավելի ուշ 2 անգամ Հայաստան ժամանեց ՀԱՊԿ գլխավոր քարտուղար Ստանիսլավ Զասը։
Առաքելության աշխատանքի արդյունքում նախատեսվում է զեկույց ներկայացնել ՀԱՊԿ անդամ երկրների ղեկավարներին տարածաշրջանում տիրող իրավիճակի մասին ու առաջարկություններ անել դրա կարգավորման համար։
ՀԱՊԿ գլխավոր քարտուղարը Փաշինյանին ներկայացրել է կատարած աշխատանքի նախնական արդյունքները
Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Սեպտեմբերի 28-ին հայտնի դարձավ, որ Ադրբեջանի զինված ուժերի ստորաբաժանումները, որոնք ապօրինաբար գտնվում են Հայաստանի ինքնիշխան տարածքում, հերթական անգամ խախտելով հրադադարի ռեժիմը՝ օգտագործելով ականանետներ և խոշոր տրամաչափի հրաձգային զինատեսակներ, կրակ են բացել սահմանի արևելյան ուղղությամբ, ինչի հետևանքով հայկական կողմից զոհվել է երեք մարդ: