ԵՐԵՎԱՆ, 29 սեպտեմբերի – Sputnik. Հայաստանը զենք է փնտրում բոլոր այն երկրներում, որտեղ առկա սպառազինությունն անհրաժեշտ է մեր պաշտպանական գերատեսչությանը։ Այդ երկրների թվում կարող է լինել և կա Հնդկաստանը։ Այս մասին ԱԺ–ում, լրագրողների հետ ճեպազրույցի ժամանակ հայտնեց ԱԺ պաշտպանության հանձնաժողովի նախագահ Անդրանիկ Քոչարյանը։
«Հայաստանը կօգտագործի բոլոր հնարավոր և անհնար միջոցները, որպեսզի այդ զենքը հասցվի երկիր»,–ասաց Քոչարյանը։
Հայտնել ենք, որ ՀՀ կառավարության այսօրվա նիստում վարչապետը հայտարարել էր, թե դեպքեր ունենք, երբ հարյուրմիլիոնավոր դոլարներ վճարված են, բայց դաշնակից երկրների կողմից Հայաստանի նկատմամբ մատակարարումների պարտավորությունները չեն կատարվում։
Լրագրողներից մեկի այն հարցին, թե ՀՀ վարչապետը ո՞ր դաշնակից երկրին նկատի ուներ, ո՞ր երկիրն է, որ չի կատարում Հայաստանի նկատմամբ զենքի մատակարարումների պարտավորությունները, Քոչարյանը կտրուկ արձագանքեց։
«Եթե անհրաժեշտ լինի, փակագծեր կբացվեն, բայց այս պահին նման անհրաժեշտություն չկա»,–ասաց նա։
Հիշեցնենք` այսօր հնդկական The Economic Times պարբերականը գրել էր, որ Հնդկաստանը Հայաստանին շուրջ 250 մլն ԱՄՆ դոլար արժողությամբ զենք և զինամթերքի խոշոր խմբաքանակ կմատակարարի։
Նշվում է, որ երկու երկրների կառավարությունների միջև սեպտեմբերի սկզբից համապատասխան պայմանագրեր են ստորագրվել։