ԵՐԵՎԱՆ, 28 սեպտեմբերի – Sputnik. ՀՀ երկրորդ նախագահ Ռոբերտ Քոչարյանի այսօրվա ասուլիսի ժամանակ լրագրողները հետաքրքրվեցին`հավակնո՞ւմ է նա արդյոք ՀՀ վարչապետի պաշտոնին։ Ի պատասխան Քոչարյանը նշեց, որ եթե ընտրություններ լինեն, իրավիճակը կգնահատի։
«Ես մասնակցել եմ ընտրություններին և «Հայաստան» դաշինքի առաջին համարն էի, իսկ սա նշանակում է` այո՛, պատրաստ էի։ Եթե չի ստացվել, ուրեմն բավարար զանգված կա՛մ չի հավատացել մեզ, կա՛մ շարունակում է հավատալ ներկա իշխանություններին։ Սակայն մենք շարունակում ենք պայքարը, և ես գիտակցում եմ, որ այսօր ավելի հավանական է մասնակի իշխանափոխության մոդելը»,–ասաց Քոչարյանը` հավելելով, որ Հայաստանում իրավիճակն այնքան պայթյունավտանգ է, որ կարող է ամեն ինչ փոխվել։
Ըստ նրա` եթե կա մարդ, որը կարող է հանրությանը համախմբել, ապա ինքը պատրաստ է աջակցել։
Քոչարյանը նշեց, որ աչքի առաջ 3-4 հոգի ունի, որոնք կարող են վարչապետի` ընդդիմության միասնական թեկնածուն լինել։ Սակայն ՀՀ երկրորդ նախագահը զերծ մնաց անուններ տալուց` ասելով, թե կարող են քրգործեր հարուցվել նրանց դեմ։
Հիշեցնենք` 2021 թվականի հունիսի 20-ին կայացած խորհրդարանական արտահերթ ընտրությունների արդյունքներով խորհրդարան անցնելու անցողիկ շեմը հաղթահարեցին «Քաղաքացիական պայմանագիր» կուսակցությունը (53.92%) և «Հայաստան» դաշինքը (21.04%)։
«Պատիվ ունեմ» դաշինքը ստացել էր 5.23% ձայն, ինչը թեև բավարար չէր ԱԺ–անցնելու համար, բայց, ընդդիմադիր այս ուժը խորհրդարան մտավ իրավունքի ուժով՝ որպես երրորդ ամենաշատ ձայներ հավաքած ուժ։