ԵՐԵՎԱՆ, 26 սեպտեմբերի – Sputnik. «Mazda» ավտոկոնցեռնը դիտարկում է Ռուսաստանում ավտոմեքենաների արտադրությունը դադարեցնելու հնարավորությունը։ Տեղեկությունը հայտնում է «Ինտերֆաքսը»՝ հղում անելով ճապոնական «Nikkei» թերթին:
Հրապարակման մեջ նշվում է, որ ընկերությունն արդեն դադարեցրել է արտադրությունը Վլադիվոստոկում «Սոլլերս Ավտո» խմբի հետ համատեղ ձեռնարկության («Մազդա Սոլլերս Մանուֆեքչուրինգ Ռուս» ՍՊԸ) շրջանակում և ուսումնասիրում է ՌԴ-ում արտադրական գործողությունների լիակատար դադարեցման հնարավորությունը:
«Վաճառքի կամ տեխնիկական սպասարկման դադարեցման մասին որոշում չի կայացվել», - նշում է թերթը։
Ռուսաստանում «Mazda»-ի գործունեության հնարավոր դադարեցման պատճառը պարբերականը համարում է մատակարարման շղթայի խափանումը, որն առաջացել է Ուկրաինայում ռազմական հատուկ գործողության սկսվելուց հետո: Այն ժամանակ «Mazda»-ն դադարեցրել էր իր արտադրանքի մատակարարումը ՌԴ։
Համատեղ ձեռնարկությունում 2021 թվականին արտադրվել է շուրջ 29 հազար մեքենա: Ընդ որում` ապրիլի վերջին ռուսական ավտոկոնցեռնը նախորդ տարվա հաշվետվության վերաբերյալ հաղորդագրության մեջ նշել էր, որ բանակցություններ է վարում բաղադրիչների դադարեցված մատակարարումների վերսկսման շուրջ:
Ավելի վաղ ՌԴ-ում ավտոմեքենաների արտադրությունը դադարեցնելու մասին պաշտոնապես հայտարարել էր «Toyota» ավտոկոնցեռնը, որը տեղակայված էր Սանկտ Պետերբուրգում: Ընկերությունը նշել էր, որ վեցամսյա պարապուրդի ընթացքում չի կարողացել մշակել այնպիսի մոտեցում, որը թույլ կտա վերադառնալ լիարժեք գործունեության և մոտ ապագայում արտադրությունը վերսկսելու հնարավորություն չի տեսնում Ռուսաստանում:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Փետրվարի 21-ից ի վեր ԱՄՆ-ն, Եվրամիությունն ու Արևմուտքի շատ երկրներ պատժամիջոցների շարք սահմանեցին Ռուսաստանի դեմ։ Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ուկրաինայում մարտական գործողություններն ընթանում են արդեն 214-րդ օրը։