ԵՐԵՎԱՆ, 24 սեպտեմբերի – Sputnik․ Պեկինում իրավիճակը հանգիստ է, անվտանգության ուժեղացված միջոցներ չկան, հաղորդում է ՌԻԱ Նովոստիի թղթակիցը։
Այսօր առավոտյան համացանցում լուրեր էին տարածվել, որ Չինաստանում պետական հեղաշրջում է և իշխանությունը զինվորականներին է փոխանցվել։ Այդ մասին լուրերը ոչ մի կերպ և ոչ ոքի կողմից չեն հաստատվել։
Բացի այդ, համացանցում լուրեր էին տարածվել, որ Պեկինի օդանավակայանում վեց հազար չվերթ է չեղարկվել։ Սակայն իրականում Պեկինի Շոուդու օդանավակայանում չեղարկվել է ընդամենը 491 թռիչք, իսկ Դասին օդանավակայանում՝ 430։ Այս օդանավակայաններից համապատասխանաբար մեկնել է 332 և 278 ինքնաթիռներ։
Չինաստանում չվերթերի չեղարկումներն ու հետաձգումները պարբերաբար տեղի են ունենում տարբեր պատճառներով՝ սկսած եղանակային պայմաններից մինչև համաճարակային իրավիճակի։ Գնացքներով ուղևորությունների զանգվածային չեղարկման մասին տեղեկություններ չկան։
Պեկինից դուրս գալն ու քաղաք մտնելը հնարավոր է առանց խնդիրների։ Ցանկացած ուղղությամբ ինքնաթիռի և գնացքի տոմսեր կարելի է ձեռք բերել սովորականի պես, միայն թե դրանք թանկանում են և արագ վաճառվում, քանի որ չինացիները տոնական շաբաթվա ընթացքում ակտիվորեն ճանապարհորդում են։
Հեռուստաալիքները, լրատվական գործակալությունները, թերթերն աշխատում են բնականոն ռեժիմով, սոցիալական ցանցերի աշխատանքում ընդհատումներ չկան։
Այժմ Չինաստանի մայրաքաղաքի բնակիչներն ակտիվորեն պատրաստվում են «Ոսկե շաբաթին», որը նվիրված է ՉԺՀ-ի հիմնադրման 73-ամյակին։ Տոնը կմեկնարկի հոկտեմբերի 1-ին։