Հայկական Կարմիր խաչն աջակցություն է տրամադրում տեղահանված անձանց

ԵՐԵՎԱՆ, 23 սեպտեմբերի – Sputnik. Հայկական Կարմիր խաչի ընկերությունն աջակցություն է ցուցաբերում ներքին տեղահանված անձանց։

Ինչպես հայտնում են ընկերության մամուլի ծառայությունից, Հայկական Կարմիր խաչի ընկերությունը՝ որպես մարդասիրական ոլորտում կառավարությանն աջակցող կառույց, այս օրերին ՀՀ աշխատանքի և սոցիալական հարցերի նախարարության և տեղական ինքնակառավարման մարմինների հետ խիստ կարիքի վրա հիմնված մարդասիրական աջակցություն է տրամադրում Գեղարքունիքի, Վայոց Ձորի և Սյունիքի մարզերի տուժած և ներքին տեղահանված բնակչությանը։ Նրանց տրամադրվում է սննդի, հագուստի, հիգիենիկ, առաջին անհրաժեշտության և անկողնային պարագաների առաջին օգնության պայուսակներ:

Առաջնային արձագանքին զուգահեռ ՀԿԽԸ-ն` Կարմիր խաչի միջազգային կոմիտեի հետ միասին իրականացնում է ռազմական հակամարտության հետևանքով ներքին տեղահանվածների մարդասիրական կարիքների արագ գնահատում՝ համապատասխան արձագանքը շարունակելու համար։

ՀԿԽԸ-ն անընդհատ համալրում է թեժ գծերով դիմող քաղաքացիների տվյալների բազան՝ այն փոխանցելով նաև ՀՀ աշխատանքի և սոցիալական հարցերի նախարարության առաջնային կարիքի հաշվառման հարթակ:

Տեղեկացվում է նաև, որ ՀԿԽԸ հոգեբաններն առերես (Կենտրոնական կլինիկական զինվորական հոսպիտալի տարածքում, Վարդենիսում, Մարտունիում), առցանց (Խնձորեսկ, Կոռնիձոր, Տեղ, Սոթք, Մեծ Մասրիկ) և թեժ գծի միջոցով (ՀՀ բոլոր մարզեր) հոգեբանական աջակցություն են տրամադրում վիրավոր և զոհված զինծառայողների հարազատներին և տեղահանված ընտանիքներին։

Հոգեբանական աջակցության համար կարելի է դիմել հետևյալ հեռախոսահամարներով՝ 8184, +374 60 627070։