Ադրբեջանի ագրեսիան Հայաստանի դեմ

ՀԱՊԿ գլխավոր քարտուղարը ՀՀ զինված ուժերի ԳՇ պետի հետ քննարկել է սահմանի իրավիճակը

ՀԱՊԿ առաքելությունը գլխավոր քարտուղար Ստանիսլավ Զասի գլխավորությամբ Հայաստան է ժամանել` գնահատելու ստեղծված իրավիճակը, հանգամանալից զեկույց նախապատրաստելու և Ադրբեջանի հետ սահմանի առանձին շրջաններում լարվածության դեէսկալացիայի նպատակով։
Sputnik
ԵՐԵՎԱՆ, 22 սեպտեմբերի – Sputnik. ՀԱՊԿ գլխավոր քարտուղար Ստանիսլավ Զասը, որը Հայաստանում է գտնվում ՀԱՊԿ առաքելության հետ, հանդիպել է ՀՀ ԶՈւ ԳՇ պետ, գեներալ-մայոր Էդվարդ Ասրյանի հետ։ Այս մասին հայտնում է ՀԱՊԿ–ի մամուլի քարտուղար Վլադիմիր Զայնետդինովը։

«Մանրակրկիտ քննարկվել է ՀՀ սահմանամերձ շրջանների առանձին հատվածներում տիրող իրավիճակը, ստեղծված իրավիճակում կազմակերպության հնարավոր հետագա միջոցների ձեռնարկումը», – ասվում է հաղորդագրության մեջ։

ՀԱՊԿ գլխավոր քարտուղար Ստանիսլավ Զասի ղեկավարած ՀԱՊԿ առաքելությունը Հայաստան է ժամանել սեպտեմբերի 13-ին ՀԱՊԿ հավաքական անվտանգության խորհրդի արտահերթ նիստի որոշման համաձայն։ Առաքելության կազմում ընդգրկված են կազմակերպության առանձին մարմինների աշխատակիցներ հանդիսացող ՀԱՊԿ անդամ պետությունների ներկայացուցիչները։
Առաքելությունը ժամանել է` գնահատելու ստեղծված իրավիճակը, տարածաշրջանում իրավիճակի վերաբերյալ ՀԱՊԿ անդամ պետությունների ղեկավարների համար հանգամանալից զեկույց նախապատրաստելու և Հայաստանի ու Ադրբեջանի սահմանի առանձին շրջաններում լարվածության դեէսկալացիայի հետ կապված առաջարկներ մշակելու նպատակով։
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
ՀՀ Անվտանգության խորհրդի հայտարարության համաձայն` Ադրբեջանի զինված ուժերի լայնածավալ ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ է սահմանվել, որն ադրբեջանցիները խախտել են սեպտեմբերի 20–ին` կրակելով Սյունիքի մարզի Ներքին Հանդի ուղղությամբ։