Այսօր Եռաբլուրում կարմիր բերետավորները ոչ թե զոհվածների ծնողներին, տիկին Գոհարին են քաշքշել , այլ սեփական խիղճը։ Տիկին Գոհարը ասֆալտից վեր կկենա, իսկ մեր ինքնագիտակցությունը` դժվար։ Sputnik Արմենիայի տաղավարում նման հայտարարություն արեց հաղորդավար, բանաստեղծ Ավետ Բարսեղյանը։
«Եռաբլուրը մեր խղճի մարմինն է, ու այնտեղից զոհվածների ծնողներին չեն հանում, այլ այդ մարմնից հոգին են հանում։ Այնքան ցավալի է, երբ սեպտեմբերի 21–ին խոսք չկա ասելու, որովհետև պետական տոներից երևի մենակ Նոր տարին է մնացել։ Մեծ ցավ է, անճարության զգացողություն է։ Երբ հաղթանակ բառը չկա, դժվար է»,–ասաց նա։
Բարսեղյանի խոսքով` երբ Անկախության օրը նմանատիպ քայլեր են անում , սեպտեմբերի 21–ը դադարում է մարդկանց արժեհամակարգում տեղ ունենալ։
Նա շեշտում է` մենք ապրել ու զգացել ենք, թե ինչ է անկախությունը։
Հիշեցնենք՝ երեկ երեկոյից զոհվածների ծնողները Եռաբլուրում էին, որպեսզի թույլ չտան վարչապետ Նիկոլ Փաշինյանի այցն այնտեղ։ Այսօր, սակայն, ոստիկաններն ուժ գործադրեցին և ծնողներին բերման ենթարկեցին` բացելով Փաշինյանի ճանապարհը։
Եռաբլուրից ոստիկանություն է տարվել 37 անձ՝ վարչական իրավախախտումների վերաբերյալ 182-րդ հոդվածի հիմքով` ոստիկանի պահանջը չկատարելու համար։ Ավելի ուշ զոհված զինծառայողների ծնողներն ազատ են արձակվել։
Հավելենք, որ ՀՀ ոստիկանության պետի հանձնարարությամբ ուսումնասիրվում է զինվորական պանթեոնում ոստիկանության ծառայողների գործողությունները։