ԵՐԵՎԱՆ, 21 սեպտեմբերի – Sputnik. Մի կողմից Եռաբլուրն են մեծացնում4 և նոր փոսեր են ավելանում այնտեղ, մյուս կողմից պաշտոնյաները փորձում են իբրև թե «խոնարհվել»։ Եռաբլուրում լրագրողների հետ զրույցում ասաց զոհված Ժորա Մարտիրոսյանի մայրը` Գայանե Հակոբյանը, որին ոստիկանները տեղափոխել էին ոստիկանության Կենտրոնի բաժին։
Նշենք, որ զոհվածների հարազատները հավաքվել էին Եռաբլուրում, որպեսզի արգելեն վարչապետ Նիկոլ Փաշինյանի այցն այնտեղ։ 37 ծնողի ոստիկաններն ուժով հեռացրին տարածքից և ոստիկանության տարբեր բաժիններ տարան։ Ծնողներից որոշները, որոնք ազատ են արձակվել, կրկին Եռաբլուր են եկել։
«Մենք գիշերը Եռաբլուրում ենք անցկացրել, և առավոտյան ընդամենը նստած էինք այստեղ, երբ ոստիկանները եկան։ Մի կնոջ դեմ 4 ոստիկան էին ուղարկել, որ մեզ բերման ենթարկեն։ Հասկանո՞ւմ եք` ուր ենք հասել, ոստիկանները քաշքշում էին մեզ, որ հեռացնեին տարածքից»,–ասաց տիկին Գայանեն` հավելելով, որ ժողովրդին արթնանալու կոչ է անում։
Զոհված զինծառայողներից Մխիթար Գալեյանի հայրը՝ Գարիկ Գալեյանը, ասաց, որ իրենց ոստիկանություն են տարել` պատճառաբանելով, թե չեն ենթարկվել ոստիկանների պահանջին։
«Ոստիկաններն ասում են` մեր պահանջին չեն ենթարկվել, տարածքը չեն ազատել` ինչի ձեր տո՞ւն եմ մտել ես։ Լավ, տղամարդկանց տարաք–տարաք, բա որդեկորույս մայրերին ինչո՞ւ եք տանում։ Եթե զոհվածի ծնողների հետ այսպես են վարվում, մտածում եմ` կարող է տղայիս արտաշիրիմում անեմ ու վերցնեմ, այս երկրից գնամ»,–ասաց Գալեյանը։
Զոհվածներից մեկի մայրն էլ ասաց` ձեռքի վրա քերծվածքներն ունի, քանի որ չորս կողմից ոստիկանները բռնել էին իրեն և տարածքից հեռացնում էին։ Ծնողները նշում են, որ զայրացել են ինչպես ոստիկանների, այնպես էլ Նիկոլ Փաշինյանի պահվածքից։