ԵՐԵՎԱՆ, 16 սեպտեմբերի – Sputnik. Կարևոր է, որ հայկական կողմը ռացիոնալ կերպով պատրաստվի ԱՄՆ Կոնգրեսի Ներկայացուցիչների պալատի խոսնակ Նենսի Փելոսիի վաղվա այցին, որպեսզի հնարավոր լինի այցի շնորհիվ ձևավորել հայ-ամերիկյան քաղաքական օրակարգ, ավելացնել արտաքին քաղաքական հնարավորությունները։ Sputnik Արմենիայի հետ զրույցում նման տեսակետ հայտնեց քաղաքագետ Սուրեն Սուրենյանցը։
Նշենք, որ Փելոսին Հայաստան է գալու վաղը. սպասվում է, որ նա Երևանում կհանդիպի վարչապետ Նիկոլ Փաշինյանի, ինչպես նաև կառավարության այլ անդամների հետ։
«Եթե ռացիոնալիզմը ստորադասվի էմոցիաներին և պատրանքներին, ապա Փելոսիի այցից նոր ռիսկեր կառաջանան, քանի որ գաղտնիք չէ, որ ԱՄՆ–ն ու Ռուսաստանը գտնվում են գլոբալ հակադրության մեջ։ Եթե հայկական կողմը հստակ օրակարգով չներկայանա, մեծ է հավանականությունը, որ ՀՀ–ն կդառնա ռուս-ամերիկյան հակադրության հերթական թիրախներից կամ թատերաբեմերից մեկը»,–ասաց Սուրենյանցը։
Նրա խոսքով` հնարավոր չէ չկարևորել նման գերտերության ներկայացուցչի այցը Հայաստան, մանավանդ որ նման մակարդակի այց չի եղել։ Մյուս կողմից, Սուրենյանցի դիտարկմամբ, տարօրինակ է, որ այդ այցը միֆականացվում է, քանի որ արտաքին միջազգային հարաբերություններում միֆականացումը երբեք լավ բանի չի հանգեցնում։
Քաղաքագետը նշում է` չպետք է մոռանալ, որ Փելոսին հայանպաստ մի շարք նախաձեռնությունների հեղինակ է Կոնգրեսում, սակայն դա չէ, որ նրան Հայաստան է բերում։ Ըստ Սուրենյանցի` Փելոսին ՀՀ է գալիս ամերիկյան և ներամերիկյան օրակարգով։
Քաղաքագետը հիշեցրեց, որ նոյեմբերին Ներկայացուցիչների պալատի միջանկյալ ընտրություններն են, և Հայաստանյան այցը շեշտակիորեն կավելացնի «Դեմոկրատական» կուսակցության օգտին ԱՄՆ–ում ապրողների քվեները։
Հարցին, թե Փելոսիի այցը որքանո՞վ կարող է ընկալվել որպես Հայաստանի հնարավոր գլոբալ վեկտորի փոփոխություն արտաքին քաղաքական օրակարգում, Սուրենյանցը պատասխանեց, թե հույս ունի, որ Հայաստանի քաղաքական ղեկավարությունը նման արկածախնդրության չի գնա։
«Չեմ կարծում, թե ՀՀ գործող ղեկավարությունն այնքան է ողջամտությունը կորցրել, որ կարող է Հայաստանի համար վտանգավոր հանգրվանում վեկտորալ փոփոխության հարց դնել։ Դա այնպիսի ռիսկեր կարող է ծնել, որ նույնսիկ 44-օրյա պատերազմի ու վերջին էսկալացիայի հետևանքները մեզ համար կարող են շատ փոքր թվալ»,–նշեց նա։
Ինչ վերաբերում է Փելոսիի այցի կոնտեքստում ԱՄՆ–ից ռազմական աջակցություն ակնկալելուն` Սուրենյանցը նշում է, որ ԱՄՆ–ն չի կարող ռազմաքաղաքական աջակցություն ցուցաբերել ՀՀ–ին։ Բայց, ըստ քաղաքագետի, ԱՄՆ–ն կարող է որոշակիորեն քաղաքական օժանդակություն ցուցաբերել, եթե պաշտոնական Երևանը կոնկրետ օրակարգ ունենա և փորձի այն որոշ կետերում ներդաշնակեցնել ամերիկյան օրակարգի հետ։