ԵՐԵՎԱՆ, 15 սեպտեմբերի – Sputnik. Հայաստանում Կարմիր խաչի միջազգային կոմիտեն կապի մեջ է Ադրբեջանի կողմից Հայաստանի վրա հարձակման հետևանքով ադրբեջանական կողմում հայտնված հայ գերիների ընտանիքների հետ: Տեղեկությունը Sputnik Արմենիայի հետ զրույցում հայտնեց ՀՀ-ում ԿԽՄԿ պատվիրակության հաղորդակցման և կանխարգելման ծրագրի ղեկավար Զառա Ամատունին։
«Երեկվանից ընտանիքները մեր գրասենյակ են այցելում, զանգահարում, բոլոր հայտերն ընդունում ենք։ Այդ ամենը հավաքագրում ենք, որ մյուս կողմին որոշակի տվյալներ ներկայացնենք»,–ասաց Ամատունին։
Ինչ վերաբերում է գերիների թվին` Ամատունին հայտնեց, որ չեն կարող վիճակագրություն հրապարակել, հատկապես հիմա, երբ հավաքագրում են տվյալները,և գրանցումներն ընթացքի մեջ են։
Ավելի վաղ միջազգային իրավական կառույցներում Հայաստանի ներկայացուցիչ Եղիշե Կիրակոսյանը հայտնել էր` սեպտեմբերի 12-13-ի գիշերը Ադրբեջանի կողմից Հայաստանի սուվերեն տարածքի նկատմամբ կատարված ագրեսիվ ռազմական հարձակման հետևանքով հայկական կողմից կա անձը նույնականացված մեկ գերեվարված անձ։
Հիշեցնենք, որ սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ:
Սեպտեմբերի 14-ին ադրբեջանցիները կրկին հրետակոծել են Ջերմուկն ու Վերին Շորժան, իսկ ավելի ուշ մարտերը վերսկսվել են նաև Սյունիքի մարզի Իշխանասարի հատվածում։
Նիկոլ Փաշինյանը խորհրդարանում հարցուպատասխանի ժամանակ հայտնել է, որ սեպտեմբերի 14–ի դրությամբ հայկական կողմն ունի 105 զոհ։
Սեպտեմբերի 15–ի ժամը 11–ի դրությամբ հայ-ադրբեջանական սահմանին էական միջադեպեր չեն արձանագրվել: