ԵՐԵՎԱՆ, 15 սեպտեմբերի – Sputnik. Արցախի ԱԺ պատգամավորները Հայաստան են եկել, տեղեկությունը հայտնում է Արցախի ԱԺ լրատվության և հանրության հետ կապերի բաժինը։
Նշվում է, որ ՀՀ են եկել Արցախի ԱԺ խմբակցությունների ղեկավարները, հանձնաժողովների նախագահները։
«Պատվիրակության անդամներն արդեն գտնվում են Երևանում՝ ստեղծված իրավիճակով պայմանավորված քաղաքական հանդիպումներ ունենալու նպատակով»,–ասված է հաղորդագրության մեջ։
ԱՀ նախագահի մամուլի քարտուղար Լուսինե Ավանեսյանն էլ հայտնել է, որ Արցախի նախագահ Արայիկ Հարությունյանը նույնպես Երևանում է։ Ավանեսյանի խոսքով` ՀՀ իշխանությունների հետ նախատեսված են քաղաքական խորհրդակցություններ, որոնց շրջանակներում ներկայացվելու են Արցախի ժողովրդի մտահոգություններն ու իշխանությունների դիրքորոշումները:
Հիշեցնենք, որ երեկ բողոքի ակցիաներ էին ինչպես Երևանում, այնպես էլ Ստեփանակերտում։ Քաղաքացիները բողոքի ակցիա իրականացնելու որոշում են կայացրել այն բանից հետո, երբ խորհրդարանում Փաշինյանը հայտարարեց, որ հայկական կողմն ուզում է ստորագրել մի թուղթ, որի արդյունքում շատերն իրենց դավաճան կանվանեն, ժողովուրդը գուցե որոշի հեռացնել նրանց իշխանությունից, սակայն իրենք գոհ ու շնորհակալ կլինեն, որ Հայաստանը 29 800 քկմ տարածքով տևական խաղաղություն կստանա։
Ավելի ուշ, ինչպես Փաշինյանը, այնպես էլ ԱԱԾ–ն հայտարարեցին, թե Փաշինյանը ոչինչ չի ստորագրել։