ԵՐԵՎԱՆ, 14 սեպտեմբերի – Sputnik. ՀՀ վարչապետ Նիկոլ Փաշինյանը վստահեցնում է` ոչ մի թուղթ իր սեղանին չկա, որն ինքը ստորագրել է կամ պատրաստվում է ստորագրել։ Այս մասին նա հայտնեց «Ֆեյսբուքի» իր ուղիղ եթերում։
«Իմ սեղանին այսօր ոչ մի թուղթ չկա։ Առաջիկա օրերին էլ նման բան նախատեսված չէ։ Նախագիծ էլ չկա, որը պետք է կա'մ ստորագրեմ, կա'մ չստորագրեմ։ Մենք ասում ենք, որ պատրաստ ենք համապարփակ լուծման գնալ։ Իմ այսօրվա հայտարարության իմաստն այն է, որ մենք խաղաղության օրակարգ ենք որդեգրել և միշտ էլ ասել ենք, որ այդ օրակարգի իրագործումը կախված չէ միայն մի կողմից։ Մենք պատրաստ ենք խաղաղության օրակարգով առաջ շարժվել։ Միջանցքով կլինի, թե այլ կերպ, մեր ինքնիշխանությունը չենք պատրաստվում սակարկման առարկա դարձնել»,– ասաց Փաշինյանը։
Խորհրդարանում Փաշինյանն այսօր հայտարարեց, որ հայկական կողմն ուզում է ստորագրել մի թուղթ, որի արդյունքում շատերն իրենց դավաճան կանվանեն, ժողովուրդը գուցե որոշի հեռացնել նրանց իշխանությունից, սակայն իրենք գոհ ու շնորհակալ կլինեն, որ Հայաստանը 29 800 քկմ տարածքով տևական խաղաղություն կստանա։
Նա ընդգծեց, որ հայրենիքի դեմ իրենք ոչ մի քայլ չեն արել և չեն անի։ Վերջինս կոչ արեց քաղաքացիներին համախմբվել պետականության շուրջ և չտրվել մանիպուլյացիաների։
Հավելենք, որ այս պահին խորհրդարանի դիմաց բազմաթիվ մարդիկ են հավաքված, նրանք դժգոհ են Փաշինյանի հայտարարությունից և պահանջում են նրա հրաժարականը։