Զոհված զինծառայողների հարազատները, ինչպես նաև մի շարք այլ քաղաքացիներ այս պահին Ազգային ժողովի շենքի մոտ են։
44-օրյա պատերազմում զոհված Սուրեն Պողոսյանի հարազատներից մեկը` Եղիշե Զաքունցը, հայտարարեց, որ վաղը առավոտյան 08։00-ից փակելու են ԱԺ-ի բոլոր մուտքերը։ Նրանք պահանջում են, որ պատգամավորները անվստահություն հայտնեն վարչապետ Նիկոլ Փաշինյանին։
«Տղաները մինչև հիմա կռվում են, պետք է սատարենք նրանց, կանգնենք հայրենիքի կողքին։ Ունենալով 2020-ի օրինակը` չենք ուզում, որ նույն վիճակում մյուս ծնողները լինեն։ Մենք վախենում ենք, որ միջանցքի փոխարեն թուրքերի գծած քարտեզն ունենանք»,– ասաց Զաքունցը։
Քաղաքացիներից ոմանք նշեցին, որ գիշերը կանցկացնեն ԱԺ–ի դիմաց։
Հիշեցնենք` սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ: Կան զոհեր ու վիրավորներ։
ՀՀ վարչապետ Նիկոլ Փաշինյանն ԱԺ–ում հարցուպատասխանի ժամանակ հայտնեց, որ զոհերի ճշտված թիվը 49 է։
Ադրբեջանի ագրեսիայի առնչությամբ ՀՀ կառավարությունն արդեն դիմել է ՌԴ-ին, ՄԱԿ-ին և ՀԱՊԿ-ին։