ԵՐԵՎԱՆ, 12 սեպտեմբերի – Sputnik. Սերբիայում ընթացող հունահռոմեական ըմբշամարտի աշխարհի առաջնությունում Հայաստանի ներկայացուցիչ, 63 կգ քաշային կարգում հանդես եկող Հրաչյա Պողոսյանը բրոնզե մեդալի համար պայքարում պարտություն կրեց։ Նրա մրցակիցը Եվրոպայի կրկնակի փոխչեմպիոն, ադրբեջանցի Թալեհ Մամադովն էր։ Խաղն ավարտվեց 4:10 հաշվով` հօգուտ ադրբեջանցու:
Հրաչյա Պողոսյանը մրցաշարին մասնակցեց 1/16 եզրափակիչից, որտեղ 5:2 հաշվով հաղթեց ճապոնացի Ռյուտո Իկեդային, 1/8 եզրափակիչում համառ պայքարում 1:1 հաշվով առավելության հասավ խորվաթ Իվան Լիզատովիցչի նկատմամբ: Քառորդ եզրափակիչում Պողոսյանը 0:4 հաշվով պարտվեց սերբ Սեբաստիան Նադին, որը հասավ եզրափակիչ և հայ ըմբիշին պայքարը շարունակելու հնարավորություն տվեց: Բրոնզե մեդալի համար սփոփիչ գոտեմարտում Պողոսյանը 9:1 հաշվով հաղթեց ռումինացի Ռազվան Արնաուտին:
Երեկոյան մրցահերթում ոսկե մեդալի համար գոտեմարտ կանցկացնի Օլիմպիական խաղերի ոսկե, արծաթե, բրոնզե մեդալակիր Արթուր Ալեքսանյանը, որը եզրափակիչում կպայքարի աշխարհի չեմպիոնի 4-րդ տիտղոսի համար: Մրցակիցը 2018 թվականի աշխարհի փոխչեմպիոն, Եվրոպայի գործող չեմպիոն, բուլղարացի Կիրիլ Միլովն է:
Հայաստանի հավաքականի կազմում աշխարհի առաջնության բրոնզե մեդալակիր է դարձել 77 կգ քաշային Մալխաս Ամոյանը:
Հայաստանի մյուս ներկայացուցիչներ Սլավիկ Գալստյանը (67 կգ), Կարապետ Չալյանը (82 կգ), Ռուդիկ Մկրտչյանը (55կգ) և Դավիթ Օվասապյանը (130 կգ) պարտություններ են կրել և լքել պայքարը:
Եվրոպայի չեմպիոն Գևորգ Ղարիբյանը (60 կգ) մեկ հաղթանակ տանելուց հետո պարտվեց 1/8 եզրափակիչում: Նրա մրցակիցը նույնպես պարտվեց, Ղարիբյանը լքեց պայքարը: